सावधान! ‘या’ बँकेला लागणार टाळे; 5 लाखांवरील रक्कम बुडणार

। नवी दिल्ली । वृत्तसंस्था ।

पुण्यातील रुपी सहकारी बँक आर्थिक अडचणीमुळे बंद होणार आहे. भारतीय रिझर्व्ह बँकेने पुण्याच्या रुपी को-ऑपरेटिव्ह बँक लिमिटेड बँकेचा परवाना रद्द केला आहे. या बँकेची आर्थिक स्थिती बिकट होती. याव्यतिरिक्त इतर अनेक कारणांमुळे रिझर्व्ह बँकेला असा निर्णय घेणे भाग पडले आहे. रिझर्व्ह बँकेने त्यांचा परवाना रद्द केला आहे. 22 सप्टेंबर 2022 नंतर बँकेच्या सर्व शाखा बंद होतील. त्या तारखेनंतर ग्राहक बँकेत जमा केलेले पैसे काढू शकणार नाही.

नियमांचे पालन न केल्यामुळे रिझर्व्ह बँक ऑफ इंडिया वेळोवेळी देशातील अनेक बँकांवर दंड आकारत असते. तर नियमांकडे दुर्लक्ष केल्यास काही बँकांचे परवाने रद्द केले जातात. आणि आता या यादीत पुण्याच्या रुपी को-ऑपरेटिव्ह बँकेचे नाव जोडले गेले आहे. आरबीआयने 10 ऑगस्ट रोजी जारी केलेल्या प्रसिद्धीपत्रकात ही माहिती दिली होती. त्या तारखेपासून सहा आठवड्यांनी पुण्याच्या रुपी को-ऑपरेटिव्ह बँक लिमिटेडचा परवाना रद्द करण्यात येईल, असे सांगण्यात आले. म्हणजेच ही अंतिम मुदत 22 सप्टेंबर 2022 पर्यंत आहे. त्यानंतर बँकेच्या सर्व शाखा बंद होतील आणि ग्राहकांना त्यांचे पैसे काढता येणार नाहीत. यापूर्वीही अनेक बँकांची बिकट आर्थिक स्थिती पाहता त्यांचे परवाने रद्द करण्यात आले आहेत.

परवाना का रद्द
या बँकेची आर्थिक स्थिती अत्यंत बिकट झाल्याने रिझर्व्ह बँकेने पुणेस्थित रुपी को-ऑपरेटिव्ह बँक लिमिटेड बंद करण्याचा निर्णय घेतला. बँकेकडे भांडवल शिल्लक नव्हते. तसेच त्यांच्याकडे कमाईचे कोणतेही साधन नव्हते. अशा परिस्थितीत आरबीआयने या बँकेचा परवानाच रद्द केला आहे.

ग्राहकांच्या पैशांचे काय?
ज्या ग्राहकांचे पैसे रुपी सहकारी बँक लिमिटेडमध्ये जमा आहेत त्यांना 5 लाखांच्या ठेवींवर विमा संरक्षण मिळते. हा विमा ठेव विमा आणि क्रेडिट गॅरंटी कॉर्पोरेशन विमा योजनेतून मिळतो. विशेष म्हणजे DICGC ही रिझर्व्ह बँकेची उपकंपनी सहकारी बँकेच्या ग्राहकांना आर्थिक सुरक्षा प्रदान करते. अशा परिस्थितीत खातेधारकाच्या 5 लाखांच्या ठेवीवर DICGC त्याला संपूर्ण विमा दावा देते. अशा परिस्थितीत ज्या ग्राहकांनी पुण्याच्या रुपी बँकेत 5 लाख रुपयांपेक्षा जास्त रक्कम जमा केली आहे, त्यांना त्यांची पूर्ण रक्कम मिळणार नाही तर त्यांना फक्त पाच लाख रुपयांपर्यंतच भरपाई दिली जाईल.