सिद्धिविनायकाच्या चरणी निनावी भक्ताकडून हिरेजडीत सोन्याचा मुकुट

| मुंबई | प्रतिनिधी |
मुंबईच्या प्रसिद्ध अशा सिद्धिविनायक बाप्पाच्या दरबारी मनोकामना पूर्ण झाल्याने एका निनावी भक्ताकडून पाऊण किलोचा हिरेजडीत सोन्याचा मुकुट दान करण्यात आलाय. लाखोंच्या घरात या हिरेजडित सोन्याच्या मुकुटाची किंमत असल्याचं बोललं जातंय. याचं व्हॅल्युएशन अद्याप करण्यात आलेलं नाहीय. बाप्पाच्या डोक्यावरती हा मुकुट ठेवण्यात आलेला आहे, ज्याला पाहण्यासाठी भक्तांची मोठी गर्दी झाली आहे.

सिद्धीविनायक मंदिरात गणेशोत्सवा दरम्यान भक्तांची मोठी रांग लागते. यावर्षीही भक्तांची मोठी रांग लागलेली आहे. देवाच्या दानात विलक्षण वाढ झालीय. सोने, चांदीच्या दागिण्यांनी बाप्पाची दानपेटी भरून वाहतेय. गर्दीचं नियोजन करण्यासाठी सुरक्षेच्या दृष्टिकोनातून पोलिसांचा बंदोबस्त वाढवण्यात आलाय.

सिद्धिविनायक मंदिर हे मुंबईतील सर्वात प्रसिद्ध मंदिरांपैकी एक आहे. मुंबईत फिरायला येणारी प्रत्येक व्यक्ती या मंदिराला दर्शन घेण्यासाठी येते. केंद्रीय स्तरापासून ते स्थानिक राजकारणातील बडे नेते इथे बाप्पाच्या आशीर्वादासाठी येतात. याशिवाय राज्यभरातील भक्त सिद्धिविनायक बाप्पाच्या चरणी लीन होण्यासाठी येत असतात. त्यामुळे या मंदिराला खूप महत्त्व आहे.