वाघाने केली शेतकऱ्याची शिकार

। नागपूर । प्रतिनिधी ।

लाखांदूर तालुक्यातील खैरी पट गावातील शेतशिवरात शेतावर गेलेल्या शेतकर्‍यावर दबा धरून बसलेल्या वाघाने हल्ला केला. या हल्ल्यात डाकराम देशमुख (43) यांचा मृत्यू झाला.

लाखांदूर तालुक्यातील खैरी/पट, विहीरगाव, डांभेविरली व टेंभरी या गावांमध्ये मागील 15 ते 20 दिवसांपासून वाघाचे दर्शन होत असून अनेक जनावरांची शिकार झाली आहे. अशातच रविवार दि. 30 मार्च रोजी खैरी/पट येथील शेतकरी डाकराम देशमुख स्वतःच्या मालकीच्या शेतावर धानपिक व मका पिकाची पाहणी आणि मोटार पंपाचे पाईप बदलवण्यासाठी सायंकाळी 5 वाजता सुमारास गेले होते. मात्र, तेथे दबा धरून बसलेल्या वाघाने डाकराम यांच्यावर हल्ला केला आणि 35 ते 40 फूट अंतरावर त्यांना मक्याच्या शेतात ओढत नेले. रात्री उशिरापर्यंत ते घरी परतले नाही. त्यामुळे कुटुंबीयांनी शोधाशोध सुरू केली. अखेर डाकराम बेपत्ता झाल्याची तक्रार पोलीस ठाण्यात करण्यात आली.

दरम्यान मध्यराञीच्या सुमारास लाखांदूर वनपरीक्षेञ अधिकारी कार्यालयाची चमु व पोलीस प्रशासन यांनी डाकराम देशमुख यांचे शोधकार्य सुरू केले. शेतात डाकराम यांची सायकल दिसल्यानंतर खैरी पट स्मशानभूमी येथे त्यांचा मृतदेह अर्धवट खाल्लेल्या अवस्थेत आढळला. वाघाने हल्ला करून त्यांना ठार केल्याचे लक्षात आले.