विदेशी प्रतिनिधी मंडळ निवडणूक प्रक्रीयेची पाहणी करणार

| खास प्रतिनिधी | रायगड |

भारत निवडणूक आयोगाने अन्य देशांच्या निवडणूक व्यवस्थापन संस्था यांच्याबरोबर आंतरराष्ट्रीय सहकार्य आणि सहभागासाठी कार्यक्रम आयोजित केला आहे. त्याअंतर्गत विदेशी प्रतिनिधी मंडळ निवडणूक प्रक्रीयेची पाहणी करण्याकरीता (दि.6) ते (दि.8) मे या कालावधीत रायगड जिल्ह्याला भेट देणार असल्याची माहिती जिल्हाधिकारी तथा जिल्हा निवडणूक अधिकारी किशन जावळे यांनी दिली.

सदर प्रतिनिधी मंडळामध्ये सात सदस्य असून ते रायगड लोकसभा मतदार संघातील विविध ठिकाणी भेट देऊन निवडणूक प्रक्रियेची पाहणी करणार आहेत. महाराष्ट्रातील केवळ रायगड जिल्ह्यामध्ये हे मंडळ भेट देणार आहे. विदेशी प्रतिनिधी मंडळामध्ये बांग्लादेशचे दोन प्रतिनिधी महंमद मोनिरुझ्झमन टी, जी. एम. शाहताब उद्दीन (बांग्लादेश निवडणूक आयोग अधिकारी) कझाकिस्तान देशाचे दोन प्रतिनिधी नुरलान अब्दिरोव, आयबक झीकन (केंद्रीय निवडणूक आयोग कझाकीस्तान), श्रीलंका देशाच्या सिलजा हिलक्का पासिलीना (संचालक श्रीलंका), झिम्बाबे देशाचे न्यायमूर्ती प्रिशीला चिगूम्बा आणि सिम्बराशे तोंगाई (केंद्रीय निवडणूक आयोग झिम्बोबे)आहेत.

हे विदेशी प्रतिनिधी मंडळ सोमवारी (दि.6) मे रोजी सकाळी 9 वा अलिबाग येथे मतदान प्रक्रियेची पाहणी करणार आहेत. पोलिंग पार्टीचे आगमन व प्रस्थान, साहित्य वाटप याची जेएसएम कॉलेज येथे पाहणी करणार आहेत. त्यानंतर दुपारी 3 वा जिल्हाधिकारी कार्यालयात जिल्हाधिकारी तथा जिल्हा निवडणूक अधिकारी यांच्या समवेत बैठक होणार आहे. (दि.7) मे रोजी विविध मतदान केंद्राना भेटी देऊन प्रत्यक्ष मतदान प्रक्रियेची माहिती घेणार आहेत.