| आगरदांडा | वार्ताहर |
भालगाव परिसरातील जंगल भागात एक 4 वर्षाचा 45 किलो वजनाचा बिबट्याचा रानटी डुकरांसाठी लावण्यात येणार्या फासात अडकून मृृत्यू झाला आहे.
एक बिबट्या फासात अडकल्याची माहिती प्रादेशिक वन विभागास मिळताच सर्व वरिष्ठ वनाधिकारी या ठिकाणी पोहचून त्याला वाचवण्याचा प्रयत्न करू लागले. या साठी पशुवैद्यकीय अधिकारी याना सुद्धा पाचारण करण्यात आले होते. परंतु सर्व यंत्रणा पोहचेपर्यंत बिबट्याचा मृत्यू झाला होता. फणसाड अभयारण्य परिसरात अनेक बिबटे असून या मधीलच एक बिबट्या भक्ष्य शोधण्याच्या नादात तो फासात अडकला आहे.
दुचाकी गाडयांना वापरण्यात येणारी वायर या फासासाठी वापरण्यात आली होती. फासात अडकल्यावर अधिक हालचाल केल्याने सदरचा फास अधिक आवळला गेला. यामध्ये बिबट्याच्या कंबरेखालील भाग मोठ्या प्रमाणात अडकला गेला. परंतु वाचवणारी यंत्रणा पोहचून सुद्धा सदरील बिबट्या दगावला. पशुवैद्यकीय अधिकारी डॉक्टर अक्षय सांगळे यांनी मृत बिबट्याचे शवविच्छेदन करून आपला अहवाल वनाधिकारी याना दिला आहे. बिबट्याच्या मुर्त्युमुळे सर्वत्र हळहळ व्यक्त करण्यात येत आहे.
वन्यजीव प्रेमी संदीप घरत यांनी सांगितले की घटनास्थळी मी उपस्थित होतो. वास्तविक पहाता घटना घडताच तातडीने आम्हाला फोन करणे आवश्यक होते. वनविभागाकडे याप्रकारच्या बचावकार्यासाठी आवश्यक यंत्रणा आणि प्रशिक्षणाचा अभाव असल्याचे ह्यातून अधोरेखित होते. अशा प्रसंगी वन्यप्राणी बचावकार्य करण्यात कार्यरत आणि निष्णात संस्था वा स्वयंसेवी मंडळींची मदत घेणे अतिशय महत्वाचे आहे, तसे केले असता सदर बिबट्याचा जीव नक्कीच वाचवता आला असता, असे ते म्हणाले.