पोलिसांची मिनीबस घुसली चहाच्या टपरीत

चार कर्मचारी जखमी, व्यावसायिकाचे मोठे नुकसान
। गोवे कोलाड । वार्ताहर ।
मुंबई-गोवा राष्ट्रीय महामार्ग 66 वरील नागोठणे-कोलाड मार्गावरील खांबनजीक पुगाव गावाजवळ व स्टॉपवर असणार्‍या रुपेश अधिकारी यांच्या चहाच्या टपरीत पोलिसांची मिनीबस घुसून हा अपघात झाला. या गाडीतून प्रवास करणारे चार पोलीस कर्मचारी किरकोळ जखमी झाले असून, मिनीबससह टपरीचे अतोनात नुकसान झाले आहे.
याबाबत सविस्तर माहिती अशी की, खांबकडून कोलाडकडे जाणारी पोलीस मिनीबस (क्र. एम.एच.06 के 9930) ही शुक्रवारी 25 फेब्रुवारी रोजी सकाळी 10.30 वाजता सदरच्या मार्गावरून प्रवास करीत असता, चालकाचा बसवरील ताबा सुटल्याने हा अपघात घडला. या अपघातात चार पोलीस कर्मचारी किरकोळ जखमी झाले असून, त्यांच्यावर कोलाड आंबेवाडी प्राथमिक आरोग्य केंद्रात उपचार सुरु आहेत. या घटनेची माहिती मिळताच कोलाड पोलीस निरीक्षक सुभाष जाधव यांच्या मार्गदर्शनाखाली पोसई श्री. घायवट अधिक तपास करीत आहेत.