ईएसआयसीच्या रकमेवर भामट्याचा डल्ला

। पनवेल । प्रतिनिधी ।

अज्ञात भामट्याने पनवेल येथील कर्मचारी राज्य विमा निगम (ईएसआयसी) च्या शाखेतील कार्यालयाचा बनावट धनादेश तयार करून त्याद्वारे 96,900 रुपये स्वतःच्या खात्यात वळवून घेतल्याचा प्रकार उघडकीस आला आहे. या भामट्याने ईएसआयसीच्या शाखा व्यवस्थापकाची बनावट सही करून ही फसवणूक केल्याचे उघडकीस आले आहे.

पनवेल शहर पोलिसांनी या प्रकरणातील अज्ञात भामट्याविरोधात गुन्हा दाखल करून त्याचा शोध सुरू केला आहे. संकेत शिंदे (38) हे पनवेल येथील कर्मचारी राज्य विमा निगम कार्यालयात शाखा व्यवस्थापक म्हणून कार्यरत आहेत. गेल्या 29 जानेवारी रोजी कार्यालयाचे कॅशियर सत्येंद्र कुमार पंडित हे बँकेचे स्टेटमेंट तपासत असताना, त्यांना खात्यातील शिल्लक रकमेत तफावत असल्याचे दिसून आले. त्यावर त्यांनी अधिक तपास केला असता, 28 जानेवारी रोजी एका चेकद्वारे 96,900 रुपये दुसऱ्या खात्यात वळवण्यात आल्याचे आढळले. धक्कादायक बाब म्हणजे, ज्या चेकद्वारे पैसे काढले गेले, तो चेक मूळ चेकबुकमध्ये तसाच कोरा असल्याचे आढळून आले. तसेच बनावट चेकवर त्याने शाखा व्यवस्थापकांची बनावट स्वाक्षरी करून त्याद्वारे 96,900 रुपयांची रक्कम उत्तर प्रदेशातील लखीमपूर खेरी येथील अ‍ॅक्सिस बँकेच्या सुशीला नामक खातेदाराच्या खात्यात वळवण्यात आल्याचे तपासात आढळले. दरम्यान, अज्ञात व्यक्तीने आणखी दोन बनावट चेकद्वारे काही रक्कम दुसऱ्या खात्यात वळवण्याचे प्रयत्न केले, मात्र ते चेक वटले नाहीत. परंतु, या प्रक्रियेत बँकेने तांत्रिक कारणास्तव ईएसआयसीच्या खात्यातून दोनदा 177 रुपये दंड म्हणून कापून घेतले आहेत. आपल्या नावाचा आणि पदाचा गैरवापर करून सरकारी निधीची चोरी झाल्याचे लक्षात येताच व्यवस्थापक संकेत शिंदे यांनी पनवेल शहर पोलिसांत धाव घेत तक्रार दाखल केली. त्यानुसार पोलिसांनी अज्ञात आरोपीविरुद्ध गुन्हा दाखल केला आहे.