| पुणे | वृत्तसंस्था |
पुण्यात हनीट्रॅपमध्ये अडकवून लुटणाऱ्या टोळीत पोलीस उपनिरीक्षकाचा सहभाग असल्याचा धक्कादायक प्रकार समोर आला आहे. काशिनाथ मारुती उभे असे गुन्हा दाखल करण्यात आलेल्या पोलीस उपनिरीक्षकाचे नाव असून गुन्हा दाखल होताच तो पसार झाला आहे. तर याप्रकरणी तिघांना अटक करण्यात आली आहे.
याबाबत सविस्तर माहिती अशी की, पुण्यामध्ये एका ज्येष्ठ नागरिकाला मोहजालात अडकवून लुटल्याप्रकरणी विश्रामबाग पोलीस ठाण्यात गुन्हा दाखल करण्यात आला आहे. कोथरूड भागातील एका ज्येष्ठाला मोहजालात अडकवून महिलेने एका हॉटेलमध्ये नेले. त्यानंतर पोलीस आणि महिला हक्क आयोगाचे सदस्य असल्याचे सांगून ज्येष्ठाला मारहाण करण्यात आली. बलात्काराचा खोटा गुन्हा दाखल करण्याची धमकी देऊन पाच लाख रुपयांची खंडणी मागितली. त्याच्याकडील 20 हजारांची रोकड मोबाईल काढून घेण्यात आला. 29 जुलै रोजी लक्ष्मी रस्त्यावरील एका हॉटेलमध्ये ही घटना घडली होती. याप्रकरणी तीन महिलांसह चौघांविरुद्ध गुन्हा दाखल करण्यात आला होता. आता उभे यांच्यावर देखील गुन्हा दाखल करण्यात आला आहे. दरम्यान, या प्रकरणी अवंतिका सोनवणे, पूनम पाटील, आरती गायकवाड यांना अटक करण्यात आली आहे. या प्रकरणाचा अधिक तपास पोलीस करीत आहेत.
हनीट्रॅपच्या जाळ्यात अडकून ज्येष्ठ नागरिकाला लुटले; 3 जणांना अटक
