माथेरान पर्यावरणाची त्रिसदस्यीय समितीकडून पाहणी

। माथेरान । वार्ताहर ।

पर्यावरण खात्याचे डॉ. थुरू (शास्त्रज्ञ श्रेणी) प्रदूषण नियंत्रण बोर्डाच्या ऋतुजा भालेराव माथेरान पालिकेच्या अधिकार्‍यांन सोबत शरलोट लेक, दस्तुरीनाका येथील बोरीचे मैदान व सिम्पसन टँक व इतर परिसराची पाहणी केली. याचा अहवाल व कोणत्या उपाययोजना करता येतील याचा अहवाल राष्ट्रीय हरित लवादाला सादर केला जाणार आहे.

घोड्यांमुळे माथेरानचे पर्यावरण उध्वस्त होत असल्याने यावर उपाययोजना करण्यासाठी राष्ट्रीय हरित लवादाने तज्ञांची समिती गठीत केली. अ‍ॅड. तुषार कुमार यांनी याचिका दाखल करण्याचा हेतू स्पष्ट केल्यावर सदर विषयाचे गांभीर्य लक्षात घेता राष्ट्रीय हरित लवादाचे न्यायाधीश शिओ कुमार सिंग व पर्यावरण तज्ञ डॉ. विजय कुलकर्णी यांनी तीन सदस्यीय समिती गठीत करण्याचे आदेश दिले या समितीमध्ये केंद्रीय पर्यावरण व वन खात्याचे अधिकारी, प्रदूषण नियंत्रण बोर्डाचे अधिकारी व मुख्याधिकारी माथेरान गिरीस्थान नगरपरिषद यांचा समावेश आहे. पुढील सुनावणी 23 डिसेंबर रोजी होणार आहे.

सर्वोच्च न्यायालयाने साल 2003 मध्ये माथेरानचे पर्यावरण अबाधित राहावे या उद्देशाने माथेरान व परिसर पर्यावरण दृष्ट्या संवेदनशील क्षेत्र म्हणून घोषित केले माथेरान येथे ब्रिटिश काळापासून वाहनांना बंदी असून घोडा व माणसांनी ओढणारी हात रिक्षा यांचा वापर अंतर्गत वाहतुकीसाठी केला जातो माथेरानचा परिसर हा सात स्क्वेअर किमी इतका छोटा आहे.

सत्तर टक्के परिसर हा घनदाट जंगलाने व्यापलेला आहे. प्रवाशी वाहतुकीसाठी 460 घोडे व मालवाहतुकीसाठी 100 ते 150 घोडे यांचा वापर केला जातो. नगरपालिकेच्या तबेल्याची संख्या फक्त 66 इतकी आहे घोड्यांची लिद तीन टन इतकी जमा होते. त्यांची विल्हेवाट लावण्याची नगरपालिकेकडे कोणतीही यंत्रणा नाही याचा सर्व परिणाम येथील येथील पर्यावरणावर होत असल्याने यावर उपाययोजना करण्याची मागणी करणारी याचिका सामाजिक कार्यकर्ते सुनिल शिंदे व केतन रमाणे यांनी पुणे येथील राष्ट्रीय हरित लवादाकडे केली आहे. 25 ऑक्टोबर रोजी याचिकेवर सुनावणी झाली.

दिल्ली येथील हरित लवादाने हिमाचल प्रदेश येथील कुफ्री येथे 800 घोड्यांचा वापर पर्यटकांसाठी केला जातो. या घोड्यांमुळे जंगल उध्वस्त होत असल्याने हरित लवादाने तेथील अश्‍वचलकांचे पुनर्वसन करून घोड्यांची संख्या कमी करण्याचा महत्वपूर्ण निर्णय घेतला आहे.