धक्कादायक! तरुणाने केली कुटुंबातील सहा जणांची हत्या

| केरळ | वृत्तसंस्था |

केरळच्या तिरुअनंतपुरमध्ये धक्कादायक घटना घडली आहे. एका 23 वर्षीय आफन या तरुणाने त्याच्या आजी, भाऊ आणि प्रेयसीसह सहा जणांची हत्या केल्याचा पोलिसांसमोर दावा केला आहे. दरम्यान, पोलिसांनी आतापर्यंत पाच जणांच्या मृत्यूची नोंद केली असून, आईची स्थिती नाजूक असल्याचे म्हटले आहे.

सोमवारी दुपारी तीनच्या सुमारास त्याने आधी त्याच्या आजीची सलमा बीवी (88) यांची पंगोडा येथील राहत्या घरात हत्या केली. त्यानंतर तो त्याचा काकाच्या अब्दुल लथिफ (58) यांच्या एस. एन पुरम येथे घरी गेला. तिथे त्याने काका आणि काकीची हत्या केली. तिथून तो पिरुमाला येथील त्याच्या घरी आला. तिथे त्याने त्याच्या आईवर हल्ला केला. तर, भाऊ अफझान (14) आणि प्रेयसी फरशाना (19) यांची हत्या केली. या हत्या केल्यानंतर तो थेट वंजारामूडू पोलीस ठाण्यात रिक्षाने गेला आणि तिथे त्याने केलेल्या कृत्याची माहिती दिली. त्यांच्या कुटुंबियांवर मोठं कर्ज होतं, त्यामुळे त्याने त्याच्या कुटुंबातील सहा जणांची हत्या केल्याची माहिती पोलिसांना दिली. गल्फमध्ये त्यांचा व्यवसाय होता. हा व्यवसाय डबघाईला आल्याने त्यांच्यावर कर्जाचा डोंगर वाढला होता. त्यानेही विष प्यायले असल्याची माहिती त्याने पोलिसांना दिली. त्यामुळे त्याला पोलिसांनी रुग्णालयात दाखल केले आहे.दरम्यान, त्याच्या माहितीवर संपूर्णपणे अवलंबून न राहता पोलिसांनी अधिक चौकशी सुरू केली आहे. त्यांचा मोबाईल फोन जप्त केला असून त्याचे कॉल डिटेल्स चेक केले जात आहेत. तसेच, त्याला ड्रग्सचे व्यसन आहे का हेही तपासले जात आहे. पोलिसांनी आतापर्यंत पाच जणांच्या मृत्यूंची नोंद केली असून, त्याची आई अत्यावस्थ अवस्थेत रुग्णालयात दाखल आहे.