किशोर-किशोरी राष्ट्रीय कबड्डी स्पर्धा

महाराष्ट्र किशोर गटाचा संघ बाद फेरीत
। उत्तराखंड । प्रतिनिधी ।
गतवेळच्या विजेत्या महाराष्ट्राने दोन साखळी सामन्यात विजय मिळवीत अ गटात अग्रस्थान मिळवीत 31व्या किशोर/किशोरी गट राष्ट्रीय अजिंक्यपद निवड चाचणी स्पर्धेत बाद फेरी गाठली. महाराष्ट्राच्या मुलींचे आव्हान दोन पराभवामुळे साखळीतच संपले. उदमपूर जिल्ह्यातील नानकपुरी, सुद्रापूर येथे झालेल्या सकाळच्या सत्रातील पहिल्या सामन्यात महाराष्ट्राने त्रिपुराचा 46-9 असा धुव्वा उडवीत साखळीतील पहिल्या विजयाची नोंद केली. मध्यांतरालाच 21-5 अशी आश्‍वासक आघाडी घेणार्‍या महाराष्ट्राने उत्तरार्धात देखील तोच जोश कायम राखत 37 गुणांच्या मोठ्या फरकाने हा विजय संपादन केला. दुसर्‍या साखळी सामन्यात मात्र त्यांना अधिक कष्ट करावे लागले. कारण त्यांची लढत यजमान उत्तराखंड बरोबर होती. महाराष्ट्राने ही चुरशीची लढत 42-35 अशी जिंकत बाद फेरी गाठली. सामन्यात महाराष्ट्राला दिल्लीकडून 40-47असे 7गुणांनी पराभूत व्हावे लागले. दुसर्‍या सामन्यात गोव्याने महाराष्ट्राला 31-30असे चकविले. या दोन पराभवामुळे महाराष्ट्राच्या मुलींचे आव्हान साखळीतच संपुष्टात आले.