हुकूमशाही राजवटीची नांदी

जिंकल्यानंतर आभार नाही तर आमदारांकडून धमकी

| अलिबाग | विशेष प्रतिनिधी |

निवडणूक जिंकल्यानंतर लोकप्रतिनिधींनी जनतेचे आभार मानणे, ही लोकशाहीची किमान अपेक्षा असते. मात्र, शिंदे गटाच्या आमदारांनी विजयाच्या नशेत ‘मै हू डॉन’ अशी घोषणा करून मतदारांच्या अपेक्षांनाच तिलांजली दिली आहे. दरम्यान, या विधानामुळे संपूर्ण तालुक्यात संतापाची लाट उसळली असून, लोकशाही व्यवस्थेला थेट आव्हान दिले जात असल्याचा आरोप नागरिकांकडून केला जात आहे.

लोकप्रतिनिधीची भूमिका सेवकाची असते; मात्र या विधानातून सत्तेचा माज आणि दडपशाहीची भाषा उघडपणे समोर आल्याने मतदारांकडून तीव्र नाराजी व्यक्त करण्यात आली आहे. सत्तेच्या जोरावर वापरलेली ही भाषा केवळ अहंकाराचे प्रदर्शन नसून, प्रशासनावर दबाव टाकण्याची, विरोधकांना गप्प बसवण्याची आणि सामान्य जनतेच्या आवाजावर गदा आणण्याची मानसिकता दर्शवते, असे मत सुजाण नागरिक व्यक्त करत आहेत. मतदारांनी दिलेला कौल हा जबाबदारीचा असून, माजाचा परवाना नाही, असे मत ज्येष्ठ नागरिकांनी व्यक्त केले आहे. तरी ही विजयाच्या नशेतून केलेली ही घोषणा प्रशासनावर दबाव, विरोधकांवर अरेरावी आणि सामान्य जनतेच्या आवाजावर गदा येण्याची भीती नागरिकांकडून व्यक्त करण्यात येत आहे.

डॉनसारखी भाषा ही लोकशाही मूल्यांना न शोभणारी असून, ही हुकूमशाही मानसिकतेची नांदी असल्याचा आरोप राजकीय विश्लेषकांकडून केला जात आहे. लोकशाहीत सत्ताधीश नव्हे, जबाबदार लोकप्रतिनिधी अपेक्षित असतो. अन्यथा सत्तेचा माज दहशतीत बदलेल आणि त्याची किंमत जनतेलाच मोजावी लागेल, असा इशारा विश्लेषकांकडून दिला जात आहे.

आज शब्दांतून धमकी दिली जात आहे; उद्या ती कृतीतून उतरली तर काय? असा थेट सवाल आता जनतेकडून विचारला जात आहे. ‘डॉन’सारख्या उपमा या कायद्याच्या राज्याला न शोभणाऱ्या असून, अशा वक्तव्यांमुळे लोकशाहीच्या मुळावर घाव घातला जात असल्याची तीव्र टीका होत आहे. त्यामुळेच या घटनेकडे केवळ एक विधान म्हणून नव्हे, तर हुकूमशाही मानसिकतेची स्पष्ट नांदी म्हणून पाहिले जात आहे. परिणामी, संविधान चालणाऱ्या देशात मडॉनगिरीमला स्थान नाही, हे सत्ताधाऱ्यांनी विसरू नये, असा इशारा नागरिकांनी दिला आहे.