कर्जत पंचायत समिती समोर उपोषण सुरू
| नेरळ | वार्ताहार |
कर्जत तालुक्यातील कोल्हारे ग्रामपंचायतीमधील धामोते गावातील स्थानिक ग्रामस्थांचा रस्ता अडविण्यात आला आहे. तो रस्ता अडविणाऱ्या व्यक्तीला कोल्हारे ग्रामपंचायत प्रशासन मदत करीत असल्याने संबंधित ग्रामपंचायतीमधील विद्यमान सदस्य यांचे सदयत्व रद्द करण्यात यावे आणि गावठाण क्षेत्रातील रस्ता खुला करण्यात यावा या मागणीसाठी रविवारी 7 जानेवारीपासून संजय विरले आणि सुनील विरले यांनी कर्जत पंचायत समिती कार्यालयाबाहेर उपोषण सुरू केले आहे.
धामोते गावातील संजय गजानन विरले यांच्या घराकडे जाणाऱ्या रस्त्यावर खोदकाम करण्यात आले आहे. त्यामुळे संजय विरले यांच्या घराकडे जाणारा रस्ता बंद झाला आहे. तेथील ग्रामपंचायतीच्या गावठाण जमिनीची खरेदी-विक्री करण्यात आली असून त्यांचे दस्त सहनिबंधक कार्यालयात नोंदविण्यात आले आहे. त्यामुळे ते अनधिकृत बांधकाम उभारण्यास सहायक निबंधक कार्यालय देखील जबाबदार आहेत. दुसरीकडे जमीनीची बेकायदा विक्री करण्यासाठी कोल्हारे ग्रामपंचायतीकडून ना हरकत दाखला देण्यात आला आहे. त्यांनतर संजय विरले यांच्या घराकडे जाणारा रस्ता पूर्णपणे बंद झाला आहे. रस्ता खुला व्हावा यासाठी संजय विरले हे गेली दोन ते तीन वर्षापासून लढा देत आहे. परंतु, प्रशासनाकडून आजतागयत दखल घेण्यात आलेली नाही. त्यांनी केलेल्या पत्र व्यवहाराला केराची टोपली दाखवली जात आहे. त्यात ग्रामपंचायत गावठाण जागेची खरेदी विक्री व त्यावर अनाधिकृत बांधकाम करणे नियमबाहय असून बेकायदेशीर कृत्य आहे.