। मुंबई । वृत्तसंस्था ।
सत्ताधारी शिवसेना,राष्ट्रवादीतील अंतर्गत कलह आता चव्हाट्यावर येऊ लागला असून.त्याचे प्रत्यंतर शनिवारी झालेल्या जीएसटी भवनाच्या भूमीपूजन दस्तुरखुद्द उपमुख्यमंत्री अजित पवार यांनीच मुख्यमंत्री उद्धव ठाकरे हे भेदभाव करीत असल्याबद्दल नाराजी व्यक्त केली.
काय म्हणाले दादा
मुख्यमंत्री साहेब इथं थोडा भेदभाव होतो. तुम्ही मराठी भाषा भवनाच्या कार्यक्रमाला येता. मात्र, आमच्या विभागाच्या कार्यक्रमाला येत नाहीत. त्यामुळं मतभेदाच्या बातम्या येतात. त्यामुळं तुम्हीच काय ते खरं सांगा, असं वक्तव्य अजित पवारांनी केलंय. जीएसटी भवनच्या भूमिपूजन कार्यक्रमात अजित पवार यांनी हे वक्तव्य केले. यावेळी मुख्यमंत्री उद्धव ठाकरे ऑनलाइन कार्यक्रमाला उपस्थित होते. परंतु, अजित पवार यांनी केलेल्या या विधानाची चांगलीच चर्चा रंगलीय.
सध्या शिवसेना आणि राष्ट्रवादी काँग्रेस यांच्यात मतभेद सुरू आहेत आणि अशातच आता उपमुख्यमंत्री अजित पवार यांनी केलेलं हे उपरोधिक वक्तव्य चांगलंच चर्चेचा विषय ठरला आहे.
जीएसटी भवनाच्या भूमिपूजन कार्यक्रमात अजित पवार यांनी म्हंटलंय की, जीएसटी भवन भूमिपूजन मुख्यमंत्री यांच्या साक्षीनं झाला आहे. मुख्यमंत्री यांनी कोरोनाचे सर्व निर्बंध हटवून ही भेट दिलीय. मागील काळात आम्ही सत्तेत असताना आम्हाला ही वास्तू उभारायची होती. मागील सरकारनं खरं तर हे काम पुढं घेऊन जायला हवा होतं. मात्र, आता महाविकास आघाडी सरकारनं हे काम हाती घेतलंय, असं त्यांनी स्पष्ट केलंय.
मराठी भाषेवर आक्रमण नको
मराठी भाषा भवन भूमीपूजन सोहळ्यात बोलताना मुख्यमंत्री उद्धव ठाकरे यांनी मराठी भाषा इतर भाषांवर आक्रमण करणार नाही. पण इतरांचे मराठीवर आक्रमण झालेल सहन करणार नाही,असा इशारा दिला आहे. मराठी भाषेबद्दल बोलण्यापेक्षा मराठी भाषेमध्ये बोला. विरोधकांनी कितीही टीका केली तरी आपल्याला पर्वा नाही, असे ठाकरे यांनी सांगितले.
मराठी भाषा भवनाचे भूमिपूजन ही आपल्या आयुष्यातील एक मोठी घटना असल्याचे मुख्यमंत्री यांनी ठाकरे यांनी सांगितले. मराठी भाषा भवन मुख्य केंद्र उभारणीसाठी जवाहर बाल भवन येथील भूखंडावरील जागा देण्याचा निर्णय झाला. या ठिकाणी सुमारे दोन हजार 100 चौरस मीटर क्षेत्र भाषा भवनासाठी मिळणार असून, 126 कोटी रुपये खर्च अपेक्षित आहे. मुंबईच्या मे. पी.के. दास न्ड असोसिएट्स यांची वास्तुविशारद म्हणून निवड करण्यात आली आहे. तर चर्नीरोड येथील मराठी भाषा भवन आणि ऐरोली येथील मराठी भाषा उपकेंद्रांचे बांधकाम महाराष्ट्र औद्योगिक विकास महामंडळाकडून होणार आहे.