जिल्ह्यात 1,01,962 गणेशमूर्तींची होणार प्राणप्रतिष्ठा
| अलिबाग | विशेष प्रतिनिधी |
मागील दोन वर्षे साधेपणाने साजरा करण्यात आलेला गणेशोत्सव यंदा धूमधडाक्यात साजरा करण्यात येणार आहे. आपल्या लाडक्या बाप्पाचे बुधवारी घरोघरी आगमन होत असून, गणेशभक्त पाहुणचार करण्यासाठी सज्ज झाले आहेत. ‘गणपती बाप्पा मोरया, मंगलमूर्ती मोरया’च्या निनादात, चैतन्यमयी वातावरणात रायगडसह संपूर्ण राज्यभर हा उत्सव साजरा करण्यात येणार असून, पुढील अकरा दिवस बाप्पांचा मुक्काम आपल्यासोबत असणार आहे. त्यानिमित्त सर्वत्र आरत्या, भजनांचे सूर घुमणार आहेत. जिल्हाभरात 1 लाख 1 हजार 962 गणपतीमूर्तींची विधीवत प्रतिष्ठापणा करण्यात येणार आहे. यामध्ये 1 लाख 1 हजार 683 खासगी, तर 279 सार्वजनिक गणेशमूर्तींचा समावेश आहे.
गौरी-गणपती सण साजरा करण्यासाठी बाजारपेठांमध्ये भक्तांची धावपळ उडाली असून, खरेदीसाठी जिल्ह्यातील बाजारपेठादेखील गर्दीने फुलून गेल्या आहेत. गणपती आरस, पूजेचे सामान याबरोबबरच आरस सजावटीचे सामान खरेदी करण्यासाठी भक्तांनी गर्दी केली आहे.
निसर्ग आणि गणेश यांचे ‘निसर्ग वाचवा’चे संदेश देणारे माठी सामान बाजारपेठेत मोठ्या प्रमाणात दाखल झाले आहे. गणेश चतुर्थीसाठी वापरण्यात येणार्या माठी सामानात औषधी गुणधर्म आहेत. या सामानात श्रीफळ, कवंडाळ, काकडी, शेरवाड, तसेच जंगलातील विविधांगी फळे-फुलांचा समावेश आहे. गणेशमूर्ती जेवढी आकर्षक त्याहीपेक्षा सजावट चांगली हवी म्हणून आरास व माठी सामानाकडे भक्तगण अधिक लक्ष देतात, असे सांगण्यात आले.
गौरी-गणपती सणासाठी चाकरमानी घर व परिसरातील साफसफाई करण्यासाठी रेल्वे, बस, एसटी, स्वत:च्या वाहनाने गावात दाखल होत आहेत. त्यामुळे रस्ते वाहतुकीचा खेळखंडोबा उडाला आहे. या सणावर महागाईचे सावट असले तरी गरीबापासून श्रीमंतांपर्यंत गणेश चतुर्थी ऐपतीप्रमाणे आनंदाने साजरी करण्यासाठी धावपळ करत आहे.
गणपती घरगुती असो किंवा सार्वजनिक मंडळाचा, हा उत्सव अधिकाधिक प्रकाशित करण्यासाठी भाविक आकर्षक विद्युत रोषणाई करण्यावर भर देतात. त्या दृष्टीने विविध प्रकारच्या वस्तू खरेदी करण्यासाठी ग्राहकांची बाजारपेठेत गर्दी वाढत आहे. विद्युत रोषणाईच्या बाजारपेठेमध्ये यंदा भारतीय वस्तू नव्याने दाखल झाल्या आहेत. एलईडी, दहा ते शंभर वॅटच्या सिंगल-मल्टिकलर फ्रेड लाइट्स, झालर यासारखे प्रकार उपलब्ध आहेत.
रोषणाईचे आकर्षण
सर्वाधिक पसंती एलईडी बल्बच्या माळांना मिळत आहे. याबरोबरच रोबलाइट्स, लेझर लाइट्स, पारलाइट्स, रोटरेटिंग लॅम्प, चक्र, एलईडी फोकस, एलईडी स्ट्रीप सेट, पळे, फुले व पानांची तोरणे, छोटी-मोठी झाडे बाजारामध्ये उपलब्ध आहेत. तीन रंग, सहा रंग ते सोळा रंगाच्या एलईडी स्ट्रीप सेटलाही जास्त मागणी आहे. याच्या किमती 80 रुपयांपासून अगदी पाच-दहा हजार रुपयांपर्यंत आहेत.
स्वदेशींना मागणी
स्वदेशी वस्तू महाग असल्या तरी त्या खरेदी केल्या जात असून, चिनी वस्तूंना यंदा मागणी नाही. याबरोबरच यावर्षी थर्माकोलपासून बनविलेल्या मखरांना बंदी आली असल्याने ग्राहक एलडी लाईट खरेदी करीत आहेत, असे इलेक्ट्रिकल्स विक्रेते शैलेश पाटील यांनी सांगितले.
गणेशोत्सवात येणार्या भक्तांना कोणतीही सक्ती नसली तरी स्वतःच्या आणि आपल्या कुटुंबाच्या आरोग्याच्या दृष्टीने खबरदारीचे उपाय करणे, सर्वांसाठीच उपयुक्त असणार आहे. सार्वजनिक आरोग्याच्या दृष्टिकोनातून गणेश मंडळांसाठी सरकारने दिलेल्या नियमांचे काटेकोररित्या पालन करावे.
अतुल झेंडे, अपर पोलीस अधीक्षक