| नेरळ | प्रतिनिधी |
साधारणतः माथेरान बाजारापासून तीस मिनिटे चालत गेल्यास अॅलेक्झांडर पॉईंट येतो. हाच पॉईंट माथेरानमध्ये येणार्या प्रत्येक पर्यटकांना खुणावतोय. माथेरान बाजारातून सरळ रस्त्याने गेल्यास एक चौक लागतो. डावीकडचा रस्ता अलेक्झांडर पॉईंटला जातो. उजवीकडे शालॉट तलावाकडे, सरळ गेल्यास चौक पॉईंट, वन ट्री हिल, ऑलम्पिया मैदानाकडे जातो. रस्त्याला मंद उतार असल्याने चालताना थकवा जाणवत नाही. गर्द झाडी, डाव्या बाजूला उतरत जाणारी खोल दरी, अन् झाडांच्या गर्दीतून ही वाट जाते. माथेरानमधील रस्त्यांना नैसर्गिक चढ-उतार आहे.
या प्रेक्षणीय स्थळावरून कर्जत तालुका आणि लोणावळा परिसर न्याहळता येतो. त्यात पळसदरी तलाव, रामबाग पॉईंट, गारबट गाव, गारबट दरी, गारबट पॉईंट, उल्हास नदीचे खोरे, काठावरची गावे, भिवपूरी पॉवर हाऊसचे टॉवर्स येथून दिसतात. सूर्योदय पहाण्यास हे ठिकाण उत्तम आहे. खंडाळा डोंगर, सोंडाईत डोंगर येथून दिसतो. कर्जत- बुरुजवाडी पोखरवाडी असे येता येते व नंतर अलेक्झांडरचा पायथा. पायथ्यावरून अलेक्झांडर पॉईंटला जाताना सगळे रस्ते, पायवाटा सारख्याच दिसत असल्याने, वाट चुकून खाटव या गावाकडे जाण्याचा धोका गिर्यारोहकाला असतो. त्यामुळे गिर्यारोहकाला सतर्क राहावे लागते. समोरच पळसाची झाडे असलेली पळसदरी आहे. कर्जत रेल्वे स्टेशनला पाणीपुरवठा करण्यासाठी पळसदरी हा तलाव रेल्वे खात्याने बांधला आहे. धरणाची लांबी कमी व पाण्याचा विस्तार व साठा भरपूर अशी धरणासाठी उत्कृष्ट जागा आहे. पळसदरी डोंगरातील धबधबे पावसाळ्यात प्रेक्षणीय आहेत.
डाव्या बाजूला डोंगरकड्यावर वसलेला माथेरान बाजार येथून दिसतो. गारबट पॉईंट ते अलेक्झांडर पॉईंट बिट्रीस क्लिफ दरी म्हणून ओळखली जाते. या दरीत नजर फिरविल्यास पावसाळ्यात असंख्य लहान मोठे धबधबे दरीत झेपावताना दिसतात. गारबट पॉईंट हे डोंगराचे दुसरे टोक आहे. तेथील ट्रेकिंग रूट येथून स्पष्टपणे दिसतो. डावीकडे गारबटदरी तर उजवीकडे पळसदरी आहे. येथून दूरवरचे डोंगर सहज न्याहाळता येतो .