गुगल प्ले स्टोअर धोरण 11 मे पासून बदलणार आहे. यामध्ये एक मोठा बदल म्हणजे अँड्रॉइड फोनमधील कॉल रेकॉर्डिंग अॅप्स बंद करण्याचे त्यांनी ठरविले आहे. यामध्ये तुम्ही कोणत्याही थर्ड पार्टी कॉल रेकॉर्डिंग अॅप्ससह अँड्रॉइड स्मार्टफोनवर कॉल रेकॉर्ड करू शकत नाही. असे कंपनीने याबाबत सांगितले आहे.
रेकॉर्डिंग अॅप्स बंद करण्याचे कारण काय?
सुरक्षेमुळे कॉल रेकॉर्डिंग अॅप्स बंद करण्यात येत आहेत. कंपनीने म्हटले आहे की कॉल रेकॉर्डिंग अॅप्स अनेक अॅप वापरताना वापरकर्त्यांकडून अनेक परवानग्या घेतात ज्याचा अनेक डेव्हलपर्स चुकीचा फायदा घेतात. याशिवाय कॉल रेकॉर्डिंग अॅप्सबाबतचा कायदाही वेगवेगळ्या देशांमध्ये वेगवेगळा आहे. त्यामुळे कंपनी त्यात बदलही करत आहे. गुगलच्या नवीन धोरणामुळे उद्यापासून कॉल रेकॉर्डिंग अॅप्स पूर्णपणे बंद होतील. या धोरणामुळे ट्रूकॉलरनेदेखील पुष्टी केली आहे की यापुढे ट्रूकॉलरवर कॉल रेकॉर्डिंग शक्य होणार नाही.
इनबिल्ट कॉल रेकॉर्डिंग अॅप्स कार्यरत राहणार?
कॉल रेकॉर्डिंगचे सर्व अॅप्स उद्यापासून बंद होणार असले तरीही, ज्या फोन्सना आधीच कॉल रेकॉर्डिंग फंक्शनॅलिटी देण्यात आली आहे ते काम करत राहतील. म्हणजेच जर तुमच्या फोनमध्ये इनबिल्ट कॉल रेकॉर्डिंग अॅप असेल तर तुम्हाला काळजी करण्याची गरज नाही. ते पूर्वीप्रमाणेच काम करत राहतील.
समस्या नेमकी कोणाला होणार?
समस्या अशा लोकांना येईल ज्यांच्या फोनमध्ये इनबिल्ट कॉल रेकॉर्डिंग अॅप नाही आणि ते कोणत्याही थर्ड पार्टी कॉल रेकॉर्डिंग अॅपद्वारे कॉल रेकॉर्ड करतात. सॅमसंग, विव्हो, रिअॅलिटी आणि इतर कंपन्यांचे बहुतेक फोन इनबिल्ट कॉल रेकॉर्डिंग फीचर्ससह येतात. त्यामुळे आता थर्ड पार्टी कॉल रेकॉर्डिंग अॅप्स वापरकर्त्यांची कॉल रेकॉर्डिंगचे माध्यम बंद होणार आहे. नवीन धोरणापूर्वीही कंपनीने असे प्रयत्न केले आहेत. कंपनीने अँड्रॉईड 10 मध्ये कॉल रेकॉर्डिंग बंद ठेवले होते. हे निर्बंध हटवण्यासाठी, अॅप्सनी ऍक्सेसिबिलिटी एपीआय वापरून कॉल रेकॉर्ड करणे सुरू केले. परंतु, गुगलच्या नव्या धोरणानंतर हे शक्य होणार नाही.