युती सरकारचे गुन्हेगारांना अभय

महाविकास आघाडीचा आरोप

| नागपूर | प्रतिनिधी |

परभणी आणि बीड प्रकरणात सरकार विरोधकांना ऐकूण घेण्यास तयार नाही. बहुमताच्या बळावर काम चालवत आहे. गुन्हेगारांना वाचविण्याचे काम सरकार करीत असल्याचा आरोप करीत महाविकास आघाडीतर्फे अधिवेशनाच्या दुसर्‍या दिवशी विधिमंडळ परिसरात निषेध मोर्चा काढण्यात आला. विधानपरिषद विरोधी पक्षनेते अंबादास दानवे यांच्या नेतृत्वातील मोर्चात आमदारांनी घोषणाबाजी करीत सरकारवर ताशेरे ओढले.

सत्ता महायुतीची पाठराखण हत्येतील आरोपींची, हत्येतील आरोपीचे साथीदार असंवेदनशील महायुती सरकार अशा आशयाचे फलक झळकावत विरोधकांनी विधान भवनाच्या पायर्‍यावर आक्रमक पवित्रा घेत घोषणाबाजी केली. यावेळी भाई जगताप, सचिन अहिर, नाना पटोले, विकास ठाकरे, जितेंद्र आव्हाड, संदीप क्षीरसागर, राहुल पाटील, सचिन भोईर आदी सहभागी झाले.

परभणी प्रकरणात पोलीस कोठडीत मृत्यू झालेल्या सूर्यवंशीच्या शवविच्छेदन अहवालात स्पष्ट उल्लेख आहे की, त्याचा पोलिसांच्या मारहाणीत मृत्यू झाला. बीडमधील सरपंचाच्या खून प्रकरणात सरकार आरोपीला पाठीशी घालत आहे. या दोन्ही प्रकरणांत सत्ताधारी आणि त्यांचे हस्तक सहभागी असल्याने महाविकास आघाडीने आंदोलनाची भूमिका घेतली असून, हा विषय आम्ही सभागृहातही उचलून धरणार आहोत, असे अंबादास दानवे यांनी सांगितले.