अपघातग्रस्तांना तात्काळ मदतीसाठी प्रयत्न करावेत- अभय चव्हाण

| खालापूर | प्रतिनिधी |

गेल्या काही दिवसात खालापूर तालुक्यातील विविध मार्गांवर झालेल्या अपघातात बळी गेलेल्यांची संख्या पाहता अपघातग्रस्तांना गोल्डन अवर्समध्ये उपचारासाठी मदत मिळावी याकरिता तालुक्यातील विविध आस्थापना, संस्थांसोबत खालापूर तालुक्याचे तहसीलदार अभय चव्हाण यांनी सरनोबत नेताजी पालकर सभागृहात औपचारिक बैठकीचे आयोजन केले होते. बैठकीदरम्यान अपघातग्रस्तांच्या मदतीसाठी सामाजिक संस्थेच्या गुरुनाथ साठेलकर यांनी प्रास्ताविक केले, तर नायब तहसीलदार सुधाकर राठोड यांनी महसूल प्रशासनाकडून या समस्येवर उपाययोजनांसाठी अपेक्षित असलेल्या लोकसहभागाची आणि सहकार्याची विस्तृत मांडणी केली.

पाली-खोपोली, खारपाडा-सावरोली, पेण-खोपोली, कर्जत-खोपोली मार्गावर तातडीने अपघातग्रस्तांना रुग्णवाहिकेअभावी मदत मिळत नसल्याने प्राण गमवावे लागत आहेत. त्याकरिता या मार्गावरील अस्थापनांनी अपघातग्रस्तांना स्वमालकीची रुग्णवाहिका सेवा उपलब्ध करून देण्याचे आवाहन यावेळी करण्यात आले. त्यासाठी सीएसआर फंडाचा वापर करण्याचा सल्ला तहसीलदार अभय चव्हाण यांनी उपस्थितांना दिला. इंडस्ट्रियल असोसिएशनचे चंद्रकांत कुलकर्णी, चौक उपजिल्हा रुग्णालयाच्या डॉ. सविता कालेल, एएमएनएस कंपनीचे किरण वैद्य, एपीआय ठाकरे यांनी या संकल्पनेचे स्वागत करून आपापले विचार मांडले. लवकरच याबाबतीत संयुक्तिक प्रक्रिया पूर्ण करून यंत्रणा विकसित करण्याचा निर्णय घेण्यात येईल, असा आशावाद तहसीलदार अभय चव्हाण यांनी व्यक्त केला.
अपघातग्रस्तांच्या मदतीसाठी सामाजिक संस्थेने बैठकीच्या आयोजनात महत्त्वाची भूमिका बजावली. एमएसआरडीसी, एमआयडीसी, पीडब्ल्यूडी, आयआरबी आणि आरोग्य खात्यातील अधिकारी यांच्यासह तालुक्यातील बहुतांशी कंपन्यांमधील अधिकारी या बैठकीस उपस्थित होते.