खारघरमधील वृद्धाला चार कोटींचा गंडा

| पनवेल | प्रतिनिधी |

डिजिटल अरेस्टचा बनाव रचून खारघरमधील वृद्धाला तब्बल 4 कोटी 38 लाख रुपयांचा गंडा घालण्यात आला होता. याप्रकरणी टोळीतील आरोपीला नवी मुंबई सायबर पोलिसांनी अटक केली आहे. अनिलकुमार गुलाबभाई पटेल (37) असे त्याचे नाव असून, सायबर पोलिसांनी मुंबई पोलिसांकडून त्याला ताब्यात घेऊन अटक केली आहे.

मिळालेल्या माहितीनुसार, सायबर टोळीने खारघर येथे राहणाऱ्या 80 वर्षीय वृद्धाला डिसेंबर ते जानेवारी या कालावधीत वरिष्ठ पोलीस अधिकाऱ्यांच्या नावाचा वापर करून संपर्क साधला होता. तसेच, त्यांच्यावर गंभीर गुन्हा दाखल झाल्यामुळे त्यांना अटक करण्यात येत असल्याची भीती घातली. तसेच, त्यांना क्राईम ब्रँच, आरबीआय, ईडी आणि सुप्रीम कोर्टाची बनावट कागदपत्रे व्हॉट्सॲपवर पाठवली. त्यानंतर डिजिटल अरेस्टच्या नावाखाली त्यांच्याकडून विविध बँक खात्यांत 4 कोटी 38 लाख 62 हजार 210 रुपये भरण्यास भाग पाडले. दरम्यान, या वृद्धाच्या खात्यातून संशयास्पद व्यवहार झाल्याने बँकेने त्यांचे खाते गोठले होते. त्यामुळे त्यांनी बँकेत संपर्क साधल्यानंतर या प्रकरणात त्यांची फसवणूक झाल्याचे त्यांच्या लक्षात आले. त्यानंतर त्यांनी नवी मुंबई सायबर पोलीस ठाण्यात धाव घेतली. त्यानंतर सायबर पोलिसांनी गुन्ह्यात वापरलेल्या बँक खात्यांचे विश्लेषण केले असता संशयित आरोपी अनिलकुमार पटेल हा वलसाड (गुजरात) येथील असल्याचे समोर आले. त्याचा पोलिसांनी तपास सुरू केला असता अनिलकुमार याला मुंबई पोलिसांनी डिजिटल अरेस्टच्या दुसऱ्या गुन्ह्यात आधीच अटक केल्याचे व तो न्यायालयीन कोठडीत असल्याची माहिती मिळाली. त्यानुसार, नवी मुंबई पोलिसांनी त्याला मुंबई पोलिसांकडून ताब्यात घेतले. यावेळी त्याच्या बँक खात्यात फसवणुकीच्या रकमेपैकी 40 लाख 20 हजार रुपये जमा झाल्याचे आढळले आहे. याबाबत अधिक तपास नवी मुंबई सायबर पोलीस करीत आहेत.