अंगणवाडी सेविका, मदतनीस 4 डिसेंबरपासून संपावर

| अलिबाग | विशेष प्रतिनिधी |
मानधन नको, वेतन हवे, या मागणीबाबत अनेक वर्षांपासून अंगणवाडी सेविका व मदतनीसांचा लढा सुरू आहे. मात्र, सरकारने त्याकडे दुर्लक्ष केल्याने महाराष्ट्र राज्य अंगणवाडी कर्मचारी संघाचे अध्यक्ष एम. ए.पाटील तसेच सरचिटणीस ब्रिजपाल सिंग यांच्या मार्गदर्शनाखाली दि. 4 डिसेंबरपासून अंगणवाडी सेविका व मदतनीस संपावर जाणार आहेत. तसे निवेदन एकात्मिक बालविकास प्रकल्प कार्यालयाला देण्यात आले.

यावेळी अंगणवाडी सेविका व मदतनीस कर्मचारी युनियनच्या अलिबाग तालुका अध्यक्ष जिविता पाटील यांनी जोपर्यंत मागण्यांची सरकार दखल घेत नाही, तोपर्यंत संपूर्ण राज्यभरात बेमुदत संप सुरूच ठेवणार असल्याचे सांगत मागण्यांसाठी एकजूट कायम ठेवून हक्कासाठी एकत्र येण्याचे आवाहन संपूर्ण अलिबाग तालुक्यातील अंगणवाडी सेविका तसेच मदतनीस यांना केले आहे.

राज्यातील अंगणवाडी कर्मचाऱ्यांना शासकीय कर्मचाऱ्यांचा दर्जा द्या, सन्मानजनक वेतनवाढ, दरमहा पेन्शन, 2023 च्या परिपत्रकात म्हटल्याप्रमाणे अंगणवाडी सेविकांमधून मुख्य सेविका थेट नियुक्ती करणे, नवीन मोबाईल देणे यासह विविध मागण्यांची पूर्तता करण्यासाठी राज्यभर आंदोलने सुरू होती. राज्य शासन व प्रशासनाशी वारंवार चर्चा करण्यात आली. परंतु मागण्यांची दखल घेण्यात आली नाही. त्यामुळे राज्य अंगणवाडी कर्मचारी कृती समितीने 4 डिसेंबरपासून राज्यभर बेमुदत संप जाहीर केला आहे.

याशिवाय चालू महिन्यातील कुठलीही माहिती, अहवाल न देणे, ऑनलाईन कामावर तसेच मासिक बैठकीवर बहिष्कार टाकण्याचा निर्णय कृती समितीचे घेतला आहे. अंगणवाडी सेविका, मदतनीस कर्मचारी युनियनचे राज्य अध्यक्ष एम.ए.पाटील, अंगणवाडी कर्मचारी संघ सरचिटणीस ब्रिजपाल सिंग, शुभा शमीम, कमल परुळेकर, भगवानराव देशमुख, दिलीप उटाणे, जीवन सुरुडे, जयश्री पाटील, रायगड अध्यक्ष रश्मी म्हात्रे, दिनकर म्हात्रे यांच्या निवेदनावर सह्या आहेत. निवेदन एकात्मिक बालविकास सेवा योजना प्रकल्पाचे अलिबाग विस्तार अधिकारी मयेकर यांना देण्यात आले.