अंजलीची राज्यस्तरीय प्रदर्शनात भरारी

। नेरळ । वार्ताहर ।

कर्जत तालुक्यातील अति दुर्गम भागात असणार्‍या रायगड जिल्हा परिषदेच्या झुगरेवाडी शाळेत इयत्ता आठवीत शिक्षण घेणार्‍या अंजली भास्कर वाघ या विद्यार्थिनीने तालुका, जिल्हा व राज्यस्तरीय विज्ञान प्रदर्शनात मोलाची कामगिरी बजावली आहे. या विज्ञान प्रदर्शनात अंजलीने तालुका व जिल्हास्तरीय प्रथम क्रमांक पटकवला आहे. तसेच, राज्यस्तरीय विज्ञान प्रदर्शनात अंजलीने तिच्या विज्ञान प्रकल्पाचे उत्कुष्ठपणे सादरीकरण केल्याने आयोजकांनी अंजलीच्या पाठीवर कौतुकाची थाप देत तिचे मनापासुन कौतुक ही केले आहे.

रायगड जिल्ह्याचे शेवटचे टोक व कर्जत तालुक्यातील अती दुर्गम बहुलभाग असलेल्या झुगरेवाडी येथील अंजली वाघ ही काहीकाळ शाळाबाह्य होती. मात्र, ती हुशार असूनही केवळ परिस्थितीमुळे तीला तीच्या आई वडिलांसोबत वीटभट्टीवर जावे लागले होते. अंजली ही हुशार असल्याने झुगारेवाडी शाळेतील शिक्षक रवी काजळे व सतीश घावट यांनी तिच्या पालकांशी संपर्क साधून मुलीला पुन्हा शाळेत पाठविण्याची विनंती करण्यात आली होती. वडिलांनी शिक्षकांचे म्हणणे ऐकून तिला शाळेत पाठवण्यास सुरू केले. शाळेत सर्व सोयी सुविधा उपलब्ध असल्याने अंजलीला अभ्यासाची व शाळेची आवड निर्माण झाली. आणि यातूनच विज्ञान शिक्षक राजश्री पाटील व नंदादीप चोपडे यांनी तिच्यावर विश्‍वास ठेवून रस्ते सुरक्षा या प्रकल्पासाठी तिची तालुका, जिल्हा व राज्यस्तरीय विज्ञान प्रदर्शनासाठी निवड केली. आपल्या प्रभावी वक्तृत्वाची चमक दाखवत अंजलीने तालुका व जिल्ह्यात आदिवासी गटातून प्रथम क्रमांक मिळवत अमरावती येथील श्री शिवाजी विज्ञान विद्यालय येथील राज्यस्तरीय विज्ञान प्रदर्शनात सहभाग घेतला.

झुगरेवाडी शाळेच्या स्थापनेपासून राज्यस्तरीय विज्ञान प्रदर्शनात संधी मिळण्याची ही पहिलीच वेळ असल्यामुळे तिने मिळविलेले हे यश हे उल्लेखनीय आहे. अंजली हिने तालुका व जिल्हा स्तरावर प्रथम क्रमांक पटकवला असून राज्यस्तरीय प्रदर्शनात आपल्या विज्ञान प्रकल्पाचे उत्कृष्ट सादरीकरण केल्यामुळे शाळेचे, शिक्षकांचे याचबरोबर तालुक्याचे नांव लौकिक केले आहे. त्यामुळे अंजली हिचे सर्व स्तरावरू कौतुक व अभिनंदन केले जात आहे.

सुरुवातीला मी काही दिवस शाळेत तर काही दिवस वीटभट्टीवर असा माझा प्रवास सुरू होता. इच्छा असूनही मला शिकता येत नव्हते. परंतु, मुख्याध्यापक रवी काजळे यांनी माझ्या वडिलांना सांगून मला शाळेत आणले. त्यामुळे मला राज्यस्तरीय विज्ञान प्रदर्शनात सहभागी होता आले. त्याबद्दल मी सर्व शिक्षकांचे व माझ्या पालकांची खूप आभारी आहे.

अंजली वाघ,
विद्यार्थिनी, झुगरे वाडी.