सरपंचपदी अंकिता जैतू बिनविरोध
| रायगड | जिल्हा प्रतिनिधी |
अलिबाग तालुक्यातील नवेदर नवगाव ग्रामपंचायतीच्या सरपंचपदासाठी घेण्यात आलेल्या पोटनिवडणुकीत अंकिता प्रणय जैतू यांची बिनविरोध निवड झाली आहे. या पदासाठी त्यांचा एकमेव अर्ज दाखल झाल्याने त्यांची निवड निश्चित झाली असून, ग्रामपंचायतीवर शेतकरी कामगार पक्षाचा लाल बावटा फडकला आहे.
अलिबाग तालुक्यात नवेदर नवगाव, कोप्रोली, रेवदंडा, वैजाली, खंडाळे आणि नागाव या सहा ग्रामपंचायतींमध्ये एका सरपंच पदासह दहा सदस्य पदांसाठी पोटनिवडणुका घेण्यात आल्या आहेत. यामध्ये नवेदर नवगाव ग्रामपंचायतीच्या थेट सरपंच पदासाठी शेतकरी कामगार पक्षाच्या अंकिता प्रणय जैतू यांचा एकमेव अर्ज दाखल झाला होता.
अर्ज दाखल करण्याच्या प्रक्रियेनंतर अन्य कोणताही उमेदवार पुढे न आल्याने अंकिता जैतू यांची सरपंचपदी बिनविरोध निवड झाल्याचे अधिकृतरीत्या जाहीर करण्यात आले. त्यांच्या निवडीमुळे स्थानिक पातळीवर आनंदाचे वातावरण निर्माण झाले असून, कार्यकर्त्यांमध्ये उत्साह पाहायला मिळत आहे. अंकिता जैतू यांच्या बिनविरोध निवडीबद्दल सर्व स्तरांतून त्यांचे अभिनंदन करण्यात येत आहे. शेतकरी कामगार पक्षाचे सरचिटणीस जयंत पाटील, पक्षाच्या प्रवक्त्या चित्रलेखा पाटील तसेच तालुका चिटणीस सुरेश घरत यांच्यासह अनेक पदाधिकारी व कार्यकर्त्यांनी त्यांच्यावर अभिनंदनाचा वर्षाव केला आहे.