। पाली/गोमाशी । वार्ताहर ।
सुधागड तालुक्यातील बुरुमाळी ही क्रिकेटची पंढरी म्हणून ओळखली जाते. गेली 37 वर्ष बुरुमाली येथे क्रिकेटच्या स्पर्धा भरविल्या जातात. त्याचप्रमाणे याहीवर्षी ग्रामस्थ मंडळ बुरुमाळी व श्री नवनाथ स्पोर्ट क्लब बुरुमाळी यांनी मर्यादित षटकांचे ओव्हरआर्म क्रिकेट सामने आयोजित केले होते.
या स्पर्धेत जिल्ह्यातील नामवंत 24 संघाने आपला प्रवेश नोंदविला होता. या स्पर्धेचा आनंद घेण्यासाठी जिल्ह्यातील क्रिडा प्रेमींनी हजेरी लावली होती. या स्पर्धेतील अंतिम लढत आपटी खालापूर आणि संडे इलेव्हन पाली या दोन संघात झाली. या अंतिम सामन्यात आपटी खालापूर या संघाने बुरुमाळी चषक 2022 वर आपले नाव कोरले. या संघास रोख रक्कम 30 हजार रूपये व आकर्षक चषक, उपविजेता संडे इलेव्हन पाली संघास 20 हजार रूपये व आकर्षक चषक तर तृतीय क्रमांक बाळा बंटी कुंभारआळी पाली या संघास 10 हजार रूपये व आकर्षक चषक देऊन गौरविण्यात आले. या स्पर्धेतील मालिकावीर संडे इलेव्हन पाली संघाचा अनंता झोलगे, उत्कृष्ट फलंदाज आपटी संघाचा सुरज, उत्कृष्ट गोलंदाज बाळा शिंदे संडे इलेव्हन पाली, क्षेत्ररक्षक रवी गोरे बाळा बंटी पाली कुंभारआळी या खेळाडूंना आकर्षक चषक देऊन गौरविण्यात आले.
या स्पर्धेच्या बक्षीस वितरणासाठी पाली उपनगराध्यक्ष आरिफ मणियार, नगरसेवक सुमेध खैरे, सहचिटणीस शेकाप पाली शहर संजोग शेठ, ग्रामस्थ मंडळ बुरुमाळी तसेच मंडळाचे पदाधिकारी आणि सदस्य, क्रिडाप्रेमी आदी मान्यवरांच्या उपस्थितीत संपन्न झाला. या संपूर्ण स्पर्धेचे धावते समालोचन श्रीयोग गायकवाड यांनी केले.