पूर्ववैमन्यातून दोघांवर प्राणघातक हल्ला

कळंब येथे घरात घुसून लोखंडी रॉडने जबर मारहाण

| पाली/बेणसे | प्रतिनिधी |

सुधागड तालुक्यातील कळंब येथे भांडणाचा राग मनात धरून लोखंडी रॉड व लाथाबुक्क्यांनी जबर मारहाण करण्यात आली आहे. तसेच जिवे मारण्याची धमकीसुद्धा दिली आहे. ही घटना शनिवारी (दि.2) पहाटे चार वाजता घडली आहे. पाली पोलीस ठाण्यात याबाबत फिर्याद देण्यात आली आहे.

जखमींना परळी येथे डॉ. साबळे यांच्याकडे उपचारासाठी नेण्यात आले. मात्र, तेथून पुढे जिल्हा रुग्णालयात अधिक उपचारासाठी नेण्यात आले. यासंदर्भात फिर्यादी धोंडू ढेबे यांनी पोलिसांना माहिती दिली. त्यांनी फिर्यादीमध्ये सांगितले की, त्यांचा भाऊ अनंता ढेबे तसेच रमेश आखाडे व तुकाराम झोरे हे झोपले असता त्या ठिकाणी आरोपींनी संगनमताने येऊन झालेल्या भांडणाचा मनात राग धरून अनंता ढेबे व रमेश आखाडे यांना लोखंडी रॉडने हाताबुक्क्यांनी मारहाण केली. तसेच शिवीगाळ व दमदाटी करत ठार मारण्याची धमकी दिली. या मारहाणीत रक्तबंबाळ झालेल्या जखमींना डोक्यावर गंभीर दुखापती झाल्या आहेत. या प्रकरणातील आरोपी भगवान तुकाराम झोरे, चंद्रकांत गोविंद आखाडे, अन्य एक अनोळखी असे तिघेजण फरार आहेत. त्यामुळे पोलिसांपुढे या आरोपींना पकडण्याचे मोठे आव्हान उभे ठाकले आहे. याप्रकरणी पाली पोलीस ठाण्यात गुन्हा दाखल करण्यात आला आहे. या प्रकरणाचा पुढील तपास पोलीस निरीक्षक सरिता चव्हाण यांच्या मार्गदर्शनाखाली महिला पो.ह. सरिता परदेशी करीत आहेत.