तिसरी ते आठवी विद्यार्थ्यांचे होणार मूल्यांकन

शाळांमधून तीन प्रगती चाचण्या घेण्याची तयारी

| रायगड | प्रतिनिधी |

स्टार्स प्रकल्पाअंतर्गत नियतकालिक मूल्यांकन चाचणी अंतर्गत पायाभूत चाचणी आणि दोन संकलित मूल्यमापन चाचण्या अशा तीन चाचण्यांचे वेळापत्रक जाहीर करण्यात आले आहे.

रायगड जिल्ह्यातील तिसरी ते आठवीच्या विद्यार्थ्यांची पायाभूत चाचणी 17 ते 19 ऑगस्ट दरम्यान, तर अन्य चाचण्या ऑक्टोबर आणि एप्रिलमध्ये होणार असल्याचे विद्या प्राधिकरणाने जाहीर केले आहे. यामध्ये रायगड जिल्ह्यातील शाळांमधील एक लाख विद्यार्थ्यांची पायाभूत चाचणी घेण्यात येणार आहे. पायाभूत चाचणीमध्ये तिसरी ते आठवीच्या विद्यार्थ्यांची 17 ऑगस्टला भाषा विषय, 18 ऑगस्टला गणित आणि 19 ऑगस्टला इंग्रजी विषयाची लेखी परीक्षा घेतली जाणार आहे. पहिली संकलित मूल्यमापन चाचणी ऑक्टोबरच्या शेवटच्या किंवा नोव्हेंबरच्या पहिल्या आठवड्यात, दुसरी संकलित चाचणी एप्रिलच्या पहिल्या किंवा दुसऱ्या आठवड्यात घेण्याचे नियोजन करण्यात आले आहे.

ही चाचणी अध्ययन अध्यापन प्रक्रिया सुलभ करण्यास मदत करणारी असेल. तसेच या चाचणीच्या माध्यमातून विद्यार्थ्यांची अध्ययन निष्पत्ती संपादणूक पडताळणे, राष्ट्रीय संपादणूक सर्वेक्षणातातील संपादणूक वाढवण्यासाठी मदत, अध्ययनात मागे असणाऱ्या विद्यार्थ्यांना पुढे नेण्यासाठी कृतिकार्यक्रम तयार करणे, इयत्ता आणि विषयनिहाय संपादणूक स्थिती समजून घेतली जाणार असल्याचे नमूद करण्यात आले आहे.

रायगड जिल्ह्यातील शाळांना पायाभूत चाचणीच्या प्रश्न पत्रिकांसोबत शिक्षक सूचनापत्र, विषयनिहाय, शाळानिहाय आणि इयत्तानिहाय उत्तरसूची पुरवण्यात येणार आहे. प्रश्नपत्रिका फाटणार किंवा भिजणार नाहीत याची दक्षता घेणे गरजेचे आहे. संबंधित चाचण्या दहावी-बारावी परीक्षेप्रमाणे नाहीत. त्यामुळे विद्यार्थ्यांना अतिरिक्त ताण देऊ नये याची काळजी घेतली जाणार आहे.

कृष्णकुमार पाटील, प्रभारी संचालक, विद्या प्राधिकरण