चार दिवस पोलिस कोठडी
। अलिबाग । विशेष प्रतिनिधी ।
पोयनाड येथील रायगड जिल्हा मध्यवर्ती बँकेच्या एटीएममध्ये चोरी करण्याचा प्रयत्न बँकेचे व्यवस्थापक यांच्या जागरुकतेमुळे हाणून पडला. या चोरट्याला एटीएममध्येच बंद करुन पोयनाड पोलिसांच्या ताब्यात देण्यात आले आहे. त्याला न्यायालयाने 4 जुलैपर्यंत पोलीस कोठडीत ठेवण्याचे आदेश दिले आहेत.
सोनुकुमार गौतम, मूळ रा. उमरव, पो. जेठवाडा-लालगंज, उत्तर प्रदेश, सध्या राहणार फादरवाडी, वसई फाटा, पालघर असे या चोरट्याचे नाव आहे. पोयनाड येथील रायगड जिल्हा मध्यवर्ती बँकेच्या शाखेच्या खाली असलेल्या एटीएममध्ये शिरुन एटीएममध्ये कार्ड टाकले. मात्र, त्यानंतर आपल्याकडील स्क्रू ड्रायव्हरच्या सहाय्याने पैसे काढण्याच्या ठिकाणचे शटर उचकटण्याचा तो प्रयत्न करु लागला.
त्याचवेळी बँकेचे शाखा व्यवस्थापक राजेंद्र पाटील यांना सीसीटिव्हीमध्ये हे दृश्य दिसले. त्यांना संशय आल्याने ते ताबडतोब आपल्या सहकार्यांसोबत एटीएमवर आले. त्यांनी एटीएमचे शटर बाहेरुन लावून घेतले. आणि पोयनाड पोलिसांना कळवले. त्यावर तातडीने सहाय्यक फौजदार दुश्यंत जाधव घटनास्थळी हजर होत त्याला शिताफीने ताब्यात घेतले. या चोरट्याला न्यायालयासमोर हजर केले असता 4 जुलैपर्यंत पोलीस कोठडीत ठेवण्याचे आदेश देण्यात आले. त्याच्याकडून चौकशी केली असता त्याने आणखी एका एटीएममधून पैसे चोरल्याचे समोर आले आहे. तसेच त्याच्याकडून चार एटीएम कार्ड, स्कू्र ड्रायव्हर जप्त करण्यात आले आहे. पोलीस निरीक्षक राहुल अतिग्रे यांच्या मार्गदर्शनाखाली अधिक तपास सहाय्यक फौजदार दुश्यंत जाधव करीत आहेत.