तळोजा कारागृहात चरस तस्करीचा प्रयत्न

खारघर पोलिसांकडून अज्ञात व्यक्तीचा शोध सुरू

| पनवेल | प्रतिनिधी |

तळोजा मध्यवर्ती कारागृहाच्या कडेकोट सुरक्षाव्यवस्थेतही अमली पदार्थ पोहोचवण्याचा प्रयत्न होत असल्याचे समोर आले आहे. कारागृहातील मुलाखत प्रतीक्षालयाच्या पत्र्यावर चरस असलेली पुडी आढळून आल्याने खळबळ उडाली आहे. या पुडीत 19.4 ग्रॅम चरस असून, त्याची अंदाजे किंमत 500 रुपये असल्याचे पोलिसांनी सांगितले. कारागृहाच्या आतील बाजूस असलेल्या मुलाखत प्रतीक्षालयाच्या पत्र्यावर एक संशयास्पद पारदर्शक प्लास्टिकची पुडी आढळली. कारागृहातील पोलिसांनी तपासणी केली असता, या पुडीत तपकिरी रंगाचा चिकट चरस असल्याचे निष्पन्न झाले. चरस कागदामध्ये गुंडाळून त्यावर सुरक्षिततेसाठी पिवळ्या रंगाची सेलो टेप लावण्यात आली होती.

प्राथमिक तपासानुसार, कारागृहात बंदिस्त असलेल्या एखाद्या कैद्याला अमली पदार्थ पुरवण्याच्या उद्देशाने अज्ञात व्यक्तीने ही पुडी बाहेरून फेकली असावी, असा संशय व्यक्त करण्यात येत आहे. मात्र, हा प्रकार नेमका कोणी केला आणि त्यामागे कोणाचा सहभाग आहे, हे अद्याप स्पष्ट झालेले नाही. घटनेची माहिती मिळताच खारघर पोलिसांनी घटनास्थळी भेट देऊन पाहणी केली. याप्रकरणी अज्ञात व्यक्तीविरोधात गुन्हा दाखल करण्यात आला आहे. कारागृहाच्या परिसरात अमली पदार्थ पोहोचवण्याचा प्रयत्न करणारी व्यक्ती बाहेरील आहे की तिला कारागृहातील कोणाची मदत मिळाली, याचा तपास पोलीस करीत आहेत. तळोजा मध्यवर्ती कारागृहात सुरक्षा व्यवस्था कडक असतानाही अशा प्रकारे अमली पदार्थ आढळल्याने सुरक्षा यंत्रणांसमोर प्रश्न निर्माण झाला आहे. या घटनेमागील सूत्रधाराचा शोध घेऊन कारागृहात अमली पदार्थांचा पुरवठा करण्याचे संभाव्य मार्ग उघड करण्याचे आव्हान पोलिसांसमोर आहे.