कर्नाळा स्पोर्ट्स क्लबजवळ स्टंटबाजी

बॅरिकेड्स हटवून दुचाकीस्वारांची धूम

| पनवेल | प्रतिनिधी |

कर्नाळा स्पोर्ट्स क्लबजवळून दि. बा. पाटील आंतरराष्ट्रीय विमानतळाच्या दिशेने जाणाऱ्या बंद उन्नत मार्गावर दुचाकीस्वारांकडून स्टंटबाजी केली जात असल्याच्या तक्रारी समोर आल्या आहेत. सुरक्षेसाठी लावलेले सिमेंटचे बॅरिकेड्स सरकवून काही तरुण या मार्गावरून भरधाव दुचाकी चालवत असल्याने अपघाताचा धोका वाढला आहे. त्यामुळे या मार्गावरील सुरक्षेचा प्रश्न ऐरणीवर आला आहे.

या परिसरात सकाळी आणि सायंकाळी व्यायामासाठी येणाऱ्या नागरिकांची वर्दळ असते. महिला, ज्येष्ठ नागरिक आणि लहान मुलेही या मार्गावर चालण्यासाठी येतात. अशा वेळी बंद मार्गावरून वेगाने जाणाऱ्या दुचाकीस्वारांमुळे पादचाऱ्यांच्या सुरक्षिततेला धोका निर्माण होण्याची भीती नागरिक व्यक्त करीत आहेत. बॅरिकेड्स लावून मार्ग बंद केलेला असतानाही ते सरकवून दुचाकी आत नेल्या जात असल्याने बंद मार्गावरील सुरक्षा व्यवस्थेवर प्रश्नचिन्ह उपस्थित होत आहे. या परिसरात काही तरुण-तरुणींकडून आक्षेपार्ह वर्तन होत असल्याच्या तक्रारीही नागरिकांनी केल्या आहेत. त्यामुळे कुटुंबासह व्यायामासाठी येणाऱ्या नागरिकांना अस्वस्थतेचा सामना करावा लागत असल्याचे सांगण्यात येते. सार्वजनिक ठिकाणी सुरक्षित आणि शिस्तबद्ध वातावरण राहावे, अशी अपेक्षा नागरिकांकडून व्यक्त होत आहे. विशेषतः सायंकाळी 6 ते 8 या वेळेत नियमित पोलीस गस्त घालावी, बॅरिकेड्स सरकवून प्रवेश करणाऱ्या दुचाकीस्वारांवर कारवाई करावी आणि सुरक्षाव्यवस्था अधिक कडक करावी, अशी अपेक्षा नागरिकांनी व्यक्त केली आहे. एखादा गंभीर अपघात घडल्यानंतर उपाययोजना करण्यापेक्षा त्यापूर्वीच पोलिसांनी या प्रकाराची दखल घ्यावी, अशी मागणी जोर धरत आहे.

अपघातापूर्वीच लक्ष द्या
बंद उन्नत मार्गावरील बेकायदा दुचाकी प्रवेश आणि स्टंटबाजीला आळा घालण्यासाठी पनवेल शहर पोलिसांनी तसेच वाहतूक पोलिसांनी तातडीने लक्ष द्यावे, अशी मागणी होत आहे.