जिल्ह्यात ड्रोन उडविण्यावर बंदी

| अलिबाग | प्रतिनिधी |

भारत सरकारच्या ‘ऑपरेशन सिंदूर’ अंतर्गत भारतीय लष्कराने पाकिस्तानमधील दहशतवादी तळांवर यशस्वी कारवाई केल्यानंतर, संभाव्य बदला घेण्याच्या दृष्टीने दहशतवादी संघटनांकडून ड्रोनचा वापर वाढल्याचे निदर्शनास आले आहे. या पार्श्‍वभूमीवर सुरक्षेच्या दृष्टिकोनातून रायगड जिल्ह्यात दि. 17 मे ते 3 जून 2025 या कालावधीत ड्रोन व तत्सम उपकरणांच्या वापरावर बंदी घालण्याचे आदेश जिल्हाधिकारी किशन जावळे यांनी दिले आहेत.

रायगड जिल्ह्यातील महत्त्वाच्या ठिकाणी तसेच आजूबाजूच्या परिसरात ड्रोन, रिमोट कंट्रोल मायक्रो लाईट एअरक्राफ्ट, पॅराग्लायडिंग, पॅरामोटर्स, हँग ग्लायडर्स आणि हॉट एअर बलून यांच्या उड्डाणास सक्त मनाई करण्यात आली आहे. हा आदेश पोलीस अधीक्षक, रायगड यांच्या शिफारशीनुसार आणि कायदा व सुव्यवस्थेच्या हिताच्या दृष्टीने घेण्यात आला आहे. आदेशाचे उल्लंघन करणार्‍यांवर कठोर कारवाई केली जाणार आहे. तरी, नागरिकांनी सहकार्य करावे, तसेच कोणतीही शंका असल्यास संबंधित पोलीस ठाण्याशी संपर्क साधावा, असे आवाहन करण्यात आले आहे.