जिद्दीच्या जोरावर बनला लष्करात लेफ्टनंट

रोह्याचा सुपुत्र प्रथम डोळेने मिळवले यश

| धाटाव | वार्ताहर |

रायगड जिल्ह्यातील रोहा तालुक्याचा सुपुत्र प्रथम विवेक डोळे यांची भारतीय लष्कारात लेफ्टनंटपदी नियुक्ती झाली आहे. या तरुणाने आपल्या जिद्दीच्या जोरावर भारतीय सैन्यात अधिकारी होण्याचा जो मान मिळवला आहे, त्याबद्दल त्याचे सर्वत्र अभिनंदन व कौतुक होत आहे. रोह्यात भारतीय दूरसंचार विभागात कार्यरत असलेले विवेक डोळे यांचा सुपुत्र प्रथम डोळे याने उत्तुंग कामगिरीच्या जोरावर लष्कारात लेफ्टनंटपदावर यश मिळविले आहे. रोह्यात जे.एम.राठी इंग्लिश स्कूल शाळेत शिकून प्रथमने शालेय जीवनात कराटे, पोहणे यासारख्या खेळांमध्ये सुवर्णपदक पटकावले होते. तसेच दहावीच्या बोर्डामध्ये 92 टक्के गुण त्याने मिळविले होते. सुट्टीमध्ये मामाकडे आजोळी गेल्यावर आजोबांचा गणवेशातील फोटो बघून भविष्यात सैन्यात जाण्याचे ध्येय त्याने निश्चित केल्यामुळे त्याने दहावीनंतर अकरावी, बारावी साठी सर्विस प्रिपरेटरी अकॅडमी, औरंगाबाद येथे प्रवेश घेतला.

दरवर्षी राष्ट्रीय रक्षा अकॅडमी (एनडीए)च्या प्रवेश परीक्षेसाठी भारतातून अंदाजे दोन लाख विद्यार्थी बसतात.त्यातच महाराष्ट्रातून फक्त 60 विद्यार्थ्यांची निवड होते. अशा अत्यंत अवघड परीक्षेत प्रथम डोळे यांनी पहिल्याच प्रयत्नात लेखी व तोंडी परीक्षेत यश मिळवले. परंतु, दुर्दैवाने शारीरिक क्षमता परीक्षेत त्याला अपयश मिळाले. परंतु, भारतीय सैन्यात जाण्याचा त्याच्या दृढ संकल्पामुळे त्याने प्रथम वर्ष इंजिनिअरिंगला प्रवेश घेऊनदेखील परत एनडीएची परीक्षा दिली आणि शारीरिक क्षमतेमध्येदेखील अथक प्रयत्नाने सुधारणा करून यश मिळवले.

एनडीएच्या खडतर प्रशिक्षणाही त्याने अभ्यासासोबतच वॉटरपोलो, बोट पुलिंग, पोहणे यासारख्या खेळातदेखील सुवर्णपदके पटकावली. त्याने राष्ट्रीय रक्षा अकॅडमी (एनडीए), खडकवासला, पुणे येथील अतिशय खडतर असे तीन वर्षाचे प्रशिक्षण नोव्हेंबरअखेरीस पूर्ण केले. राष्ट्रपती द्रौपदी मुर्मू यांच्या हस्ते त्याला गौरविण्यात आले आहे. प्रथम डोळे याचे डेहराडून येथे एक वर्ष प्रशिक्षण झाल्यानंतर तो भारतीय सैन्यात लेफ्टनंट या पदावर रुजू होणार आहे.