उरण पोलिसांचे जनतेला आवाहन
। उरण । वार्ताहर ।
दिवसेंदिवस पैशांची चणचण जाणवत असल्याने पैसा मिळविण्यासाठी माणूस कोणत्याही धरायला जाण्याचे प्रमाण वाढले आहे. अशा एका टोळीने काही क्षणात तुम्हांला लोन देण्याचे आमिष दाखवून नंतर लोन घेणार्यांचा मोबाईल डाटा चोरून त्यांचे अश्लिल फोटो एडीट करून ब्लॅकमेल करून लूट केली जात आहे. याचा त्रास उरणमधील काहींना आला असून ते भितीपोटी व लाजेखातर या टोळीच्या आमिषाला बळी पडले आहेत. तरी अशा मोबाईलवर येणार्या फसव्या लोन अथवा इतर अॅप पासून जनतेने सावधान रहावे. पोलिसांनी अशा ब्लॅकमेल करणार्या टोळीचा शोध घेऊन कारवाई करण्याची मागणी जनतेतून जोर धरू लागली आहे.
कोरोना नंतर आता कुठे पूर्वपदावर येऊ लागले आहे. त्यामुळे पैसा हाती नसल्याने तो मिळविण्यासाठी माणूस आपल्या मोबाईलवर त्वरित लोन दिले जाईल असा मेसेज आल्यावर लगेच या आमिषाला बळी पडून ठराविक लोन घेतात. अगदी कोणतीही कागदपत्रे न घेता त्वरित लोन दिले जाते. अॅपच्या माध्यमातून मिळाले लोन घेतल्यानंतर अगदी 1 तास ते 2 तासात ही तुम्ही त्याचा परतावा करण्याच्या कालावधी आहे. त्यानंतरच ही टोळी आपला डाव साधत संबंधित कर्जदारांचा मोबाईल डाटा चोरून आपल्याकडे सर्व डाटा जमा करतात. त्यातील आपलेच फोटो एडीट करून आपल्याच मोबाईल मधील महिलांसोबत फोटो जोडले जातात. अशा फोटोंचा वापर करून संबंधित माणसांना संबंधित फोटो व्हायरल करण्याची धमकी देऊन ब्लॅकमेल करून पैशांची मागणी केली जाते. उरणमधील काहीजण या आमिषाला बळी पडले आहेत. त्यांना लोनपेक्षा अधिक रक्कम भरावी लागली आहे. तरीही आजही त्यांच्या पाठीमागे ससेमिरा सुरूच आहे. जनतेने अशा कोणत्याही आमिषाला बळी पडू नये. याविरोधात पोलिसांकडे तक्रार करून दाद मागावी असे आवाहन पोलिसांनी केले आहे.