नवनीत राणाला भाजपने भुंकण्यासाठी सोडलंय

इम्तियाज जलिल यांचा जबरा पलटवार

| छत्रपती संभाजीनगर | वृत्तसंस्था |

भारतीय जनता पार्टीला काही भुंकणारे लोक हवे आहेत. याअगोदर हैदराबादचे आमदार भुंकण्यासाठी सोडले होते, आता तो संपलेला आहे, म्हणून या बाईला सोडले आहे. नवनीत राणा ही चिप मेंटॅलिटीची बाई आहे. तुमचा धर्म आहे, याचा आम्ही आदर करतो. पण, हनुमान चालीसा उद्धव ठाकरे यांच्या घरासमोरच का वाचायची होती. चीप पब्लिसिटी घेण्यासाठी ही कोणत्याही गोष्टीला मोठं करते, अशा शब्दात इम्तियाज जलील यांनी नवनीत राणांवर प्रहार केला.

भाजपा महायुतीच्या उमेदवार आणि खासदार नवनीत राणा यांनी आपल्या भाषणातून आक्रमक पवित्रा घेत एमआयएमच्या ओवैसी बंधुंवर जोरदार हल्लाबोल केला आहे. हैदराबादमधील भाजपा उमेदवार लता माधवी यांच्या प्रचारासाठी नवनीत राणांनी भाषण करताना, एमआयएमच्या नेत्यांना लक्ष्य केले. अकबरुद्दीन ओवैसींच्या भाषणाचा संदर्भ देत, 15 मिनिटांसाठी नाही, केवळ 15 सेकंदांसाठी पोलीस हटवा मग ह्या दोन्ही भावांना कुठून कुठं पळावं हेही कळायंचे नाही, असे नवनीत राणांनी म्हटले होते. त्यानंतर, असदुद्दीन ओवैसींनी नवनीत राणांवर पलटवार केला. मात्र, राणा विरुद्ध एमआयएम असा वाद अद्यापही सुरूच आहे. आता, खासदार इम्तियाज जलील यांनी नवनीत राणांवर शेलक्या शब्दात टीका केली आहे.

छत्रपती संभाजी नगर लोकसभा मतदारसंघात शनिवारी प्रचार संपला. त्यामुळे संदिपान भुमरे, चंद्रकांत खैरे आणि इम्तियाज जलील या तिन्ही प्रमुख उमेदवारांकडून प्रचाराच्या शेवटच्या दिवशी मोठं शक्तीप्रदर्शन करण्यात आले. छत्रपती संभाजी नगरच्या पीर बाजारातून एमआयएमच्यावतीने इम्तियाज जलील यांच्या प्रचारार्थ मोठ्या रॅलीचा आयोजन करण्यात आल आहे. या रॅलीत बोलताना, आपणच पुन्हा एकदा खासदार म्हणून निवडून येणार, असा विश्वास जलील यांनी व्यक्त केला. याशिवाय नवनीत राणांनी केलेल्या वक्तव्यावर प्रतिक्रिया देताना त्यांनी खासदार नवनीत राणांवर जोरदार पटलवार केला. काही लोक हे भाजपने भुंकण्यासाठी ठेवले आहेत, नवनीत राणा म्हणजे चिप मेंटॅलिटीची बाई असल्याचे जलील यांनी म्हटले आहे.