मराठी साहित्य संमेलनाला गालबोट

संमेलनाच्या कार्याध्यक्षांच्या तोंडाला फासले काळे; आंदोलक पोलिसांच्या ताब्यात

| सातारा | प्रतिनिधी |

साताऱ्यात आयोजित अखिल भारतीय मराठी संमेलनाच्या दुसऱ्या दिवशी शनिवारी खळबळजनक घटना घडली. या संमेलनाचे कार्याध्यक्ष विनोद कुलकर्णी यांच्या तोंडाला एका व्यक्तीने काळे फासले. हा व्यक्ती रिपाइचा कार्यकर्ता असल्याचा दावा केला जात आहे. त्याने विनोद कुलकर्णी यांच्या तोंडाला काळे का फासले? हे अद्याप स्पष्ट झाले नाही. पण, यामुळे साहित्य वर्तुळात एकच खळबळ माजली आहे.

साताऱ्यातील मराठी साहित्य संमेलनाचे शुक्रवारी सकाळी साहित्यिक डॉ. मृदुला गर्ग यांच्या हस्ते व मुख्यमंत्री देवेंद्र फडणवीस यांच्या प्रमुख उपस्थितीत उद्घाटन झाले. त्यानंतर शनिवारी दुसऱ्या दिवशी संमेलनात वेगवेगळे कार्यक्रम सुरू असताना संदीप जाधव नामक एका व्यक्तीने संमेलनाचे कार्याध्यक्ष विनोद कुलकर्णी यांच्या तोंडाला काळे फासले. अचानक घडलेल्या या घटनेमुळे सर्वचजण स्तब्ध झाले. स्वतः कुलकर्णी यांनाही काही क्षण काय झाले हे समजले नाही. संदीप जाधव यांनी हा हल्ला का केला? हे अद्याप स्पष्ट झाले नाही. पण, ते रिपाइचे कार्यकर्ते असल्याचे सांगितले जात आहे.

या घटनेचा एक व्हिडिओ सोशल मीडियावर व्हायरल झाला आहे. त्यात गळ्यात निळा रुमाल असलेले संदीप जाधव जय जवान, जय किसानच्या घोषणा देत विनोद कुलकर्णी यांच्या तोंडाला काळे फासताना दिसत आहेत. काळे फासल्यानंतर हल्लेखोर व्यक्ती राष्ट्रगीत म्हणतानाही व्हिडिओत दिसत आहे. ही घटना व्यासपीठावर जाणाऱ्या पायऱ्यांजवळ घडली. शाहूपुरी पोलिसांनी आंदोलनकर्त्याला ताब्यात घेतले आहे.