कशेडी घाटामध्ये साडेचोवीस किलो गांजासह ब्रिझा कार जप्त

पोलीसांची चाहूल लागताच ‘छोट्या’ पसार तर दुसरा अटकेत

| पोलादपूर | प्रतिनिधी |

मुंबई-गोवा राष्ट्रीय महामार्ग क्रमांक 66 वरील पोलादपूर तालुक्यातील धामणदेवी गावाजवळील हॉटेल अन्नपूर्णा येथे पांढर्‍या रंगाच्या मारुती ब्रिजा कारमध्ये गांजा हा अंमली पदार्थ विक्रीसाठी आलेल्या तरूणास पोलादपूर पोलिसांसह स्थानिक गुन्हे अन्वेषण विभागाच्या पोलिसांनी कारवाई केली. या कारवाईत ब्रिझा कारसह गाडीतील सुमारे साडेचोवीस किलो गांजा जप्त करण्यात आला. याप्रकरणी बुधवारी रात्री उशिरा साडेअकरा वाजता गुन्ह्याची नोंद पोलादपूर पोलीस ठाण्यात करण्यात आली असून, या छाप्यामुळे पोलादपूर तालुक्यात गांजा विक्री करणार्‍यांचे धाबे दणाणले आहेत.

मुंबई-गोवा महामार्गावर पोलादपूर तालुक्यातील धामणदिवी गावानजीक अन्नपूर्णा हॉटेलजवळ बुधवारी सायंकाळी सव्वासात वाजण्याच्या सुमारास पांढर्‍या रंगाची मारुती ब्रिझा कार (क्र. 24 बीएच 1593) उभी होती. यावेळी नशाकारक अंमली पदार्थाची विक्री करण्यासाठी आलेला आरोपी विक्की विजय गोस्वामी उर्फ छोट्या (रा. शाहूनगर, पाचगणी, जि. सातारा) याने पोलिसांची चाहूल लागताच गाडीची चावी घेत हॉटेल परिसरातून पलायन केले. पोलिसांकडून गाडीची पाहणी करीत असताना या गाडीत 22 किलो 435 ग्रॅम वजनाचा सुमारे 7 लाख 33 हजार 50 रुपये किमतीचा हिरवट रंगाचा गांजा हा अंमली पदार्थ निळसर पांढर्‍या रंगाच्या गोणीमध्ये आढळून आला. याप्रकरणी पोलिसांनी दोन आरोपींपैकी एका आरोपीला अटक केली. पोलिसांनी अंमली पदार्थासह 8 लाखाची कार असा एकूण 15 लाख 33 हजार 50 किमतीचा मुद्देमाल जप्त केला.

स्थानिक गुन्हे अन्वेषण, अलिबाग-रायगडचे पोलीस कॉन्स्टेबल बाबासाहेब पिंगळे यांनी दिलेल्या फिर्यादीनुसार मंगेश मधुकर भिलारे (27, रा. गुरेघर, ता. महाबळेश्‍वर,जि. सातारा) यास अटक करण्यात आली असून, दुसर्‍या आरोपीचा शोध सुरू आहे. याप्रकरणी पोलादपूर पोलीस ठाण्यात गुन्हा नोंद केल्याप्रमाणे ही कारवाई करण्यात आली आहे. घटनास्थळी पोलादपूर पोलीस ठाण्याचे पोलीस निरीक्षक अनिल जाधव यांनी भेट दिली. या कारवाईमध्ये पोलादपूर पोलीस ठाण्याचे पोलीस उपनिरिक्षक शिंदे यांच्यासह जितेंद्र चव्हाण, प्रतिक सावंत, अक्षय पाटील, स्वप्नील कदम, संग्राम बामणे, कृष्णा जागडे, चंद्रकला भुरके, नारायण दराडे आदी पोलादपूर पोलीस ठाण्याचे कर्मचारी तसेच स्थानिक गुन्हे अन्वेषण विभागाचे पोलादपूर कर्मचारी सहभागी झाले. याप्रकरणी अधिक तपास स्थानिक गुन्हे अन्वेषण विभागाचे पोलीस उपनिरीक्षक नरे हे करीत आहेत.