लवकरच फोन करते… हे शब्द ठरले तिचे अखेरचे

न्हावे येथील मैथिली पाटील हिचा विमान अपघातात मृत्यू

| उरण | घन:श्याम कडू |

आभाळाला गवसणी घालणाऱ्या लेकराचं स्वप्न आकाशातच कोसळलं! अहमदाबादहून लंडनसाठी उड्डाण केलेले एअर इंडियाचे विमान गुरुवारी (दि.12) दुपारी कोसळले. या अपघातात न्हावा गावच्या मैथिली मोरेश्वर पाटील (23) या तरुणीचा दुर्दैवी मृत्यू झाला. दोन वर्षांपासून एअर इंडियामध्ये एअर होस्टेस म्हणून सेवेत असलेल्या या तरुणीच्या जाण्याने संपूर्ण कोकण हळहळला आहे.

गुरुवारी सकाळीच आई-वडिलांचा निरोप घेत, “लवकरच फोन करते” असं सांगून मुंबईमार्गे अहमदाबादकडे रवाना झालेली मैथिली आता कधीच परत येणार नाही, याची कुणालाही कल्पना नव्हती. लंडनकडे जाणाऱ्या विमानात तिची ड्युटी होती आणि ती तिची अखेरची उड्डाणं ठरली. 12 क्रू मेंबर्स व 242 प्रवाशांसह उड्डाण केलेलं विमान काही वेळातच रहिवासी भागावर कोसळलं. विमान कोसळल्यानंतर क्षणार्धात त्याने पेट घेतला. यात मैथिलीचाही आगीत होरपळून अंत झाला.अपघाताची बातमी मिळताच न्हाव्याच्या पाटील कुटुंबावर आभाळ कोसळलं. वडील, आई आणि मामा तातडीने अहमदाबादकडे रवाना झाले. निकटवर्तीय जितेंद्र म्हात्रे यांनी याबाबत माहिती दिली.

स्वप्नांना पंख देणाऱ्या एका गावकुसातल्या मुलीचा प्रवास इतक्या भयावहरीत्या संपेल, याचा विचार करून न्हावा गाव हादरून गेला आहे. एक हसरी, उमदी, मेहनती मुलगी आता फक्त आठवणीत राहिली आहे.