महिलेवर महावितरणकडून गुन्हा दाखल
। पनवेल । वार्ताहर ।
सीबीडीतील दिवाळे गावात रहाणार्या एका महिलेने घरातील विद्युत मिटरला वीज पुरवठा करणार्या केबलला दोन ठिकाणी वायरने टॅपिंग करुन आपल्या तळ मजला व वरच्या मजल्यावरील घराला चोरुन वीज घेतल्याचे उघडकिस आले आहे. महावितरणच्या विशेष पथकाने केलेल्या तपासणीत ही वीज चोरी उघडकिस आली आहे. मागील दोन वर्षामध्ये सदर महिलेने तब्बल 21 लाख 44 हजार रुपये किंमतीची एकुण 82 हजार 307 युनिटची वीज चोरी केल्याचे उघडकिस आली आहे. त्यानुसार एनआरआय पोलिसांनी सदर महिलेविरोधात वीज चोरीचा गुन्हा दाखल केला आहे.
महावितरणच्या वतीने गत सफ्टेंबर महिन्यापासून वीजेची चोरी करणार्यांविरोधात विशेष मोहिम हाती घेण्यात आली आहे. या मोहिमेत सीबीडीतील दिवाळे गावात रहणार्या एका महिलेच्या तळ मजला व वरच्या मजल्यावरील घरासाठी असलेल्या दोन वीज मिटरचे बील खुप कमी येत असल्याची माहिती विशेष पथकाला मिळाली होती. त्यामुळे विशेष पथकाने सदर महिलेच्या तळ मजला व वरच्या मजल्यावरील घरासाठी असलेल्या दोन्ही वीज मिटरची तपासणी केली होती. यात फिडर पिलर मधून घरातील विद्युत मिटरला वीज पुरवठा करणार्या इन्कमिंग केबलला दोन ठिकाणी चोरुन लाल व काळ्या वायरने टॅपिंग केल्याचे आढळून आले.
अशा पद्धतीने सदर महिलेने तब्बल 21 लाख 44 हजार रुपये किंमतीची एकुण 82 हजार 307 युनिटची वीज चोरी करुन महावितरणचे नुकसान केल्याचे आढळुन आले. सदरची वीज चोरी उघडकिस आल्यानंतर महावितरणच्या विशेष पथकाने वीज ग्राहक असलेल्या महिलेला 15 नोव्हेंबर पर्यंत वीज चोरीची रक्कम भरण्यासाठी मुदत दिली होती. मात्र सदर महिलेने वीज चोरीची रक्कम न भरल्याने महावितरणचे सहाय्यक अभियंता रोहित बागुल यांनी एनआरआय पोलीस ठाण्यात त्यांच्या विरोधात तक्रार दाखल केली. त्यानुसार पोलिसांनी सदर महिलेविरोधात विद्युत कायदा 2003 कलम 135 नुसार गुन्हा दाखल केला आहे.