छोटम शेठ यांना चोंढी येथील मारहाण प्रकरण भोवले

जिल्हा न्यायालयाचा महत्त्वपूर्ण निर्णय

| रायगड | जिल्हा प्रतिनिधी |

चोंढी नाक्यावर घातक शस्त्राने मारहाण केल्याप्रकरणी शिंदे गटातील दिलीप भोईर उर्फ छोटमशेठ यांच्यासह 21 जणांना जिल्हा न्यायालयाने दोषी ठरवत सात वर्षे सक्तमजुरी आणि प्रत्येकी तीन हजार रुपये दंड अशी शिक्षा गुरुवारी (दि.30) सुनावली. एकूण 25 आरोपींपैकी चार आरोपींची न्यायालयाने निर्दोष मुक्तता केली आहे. प्रमुख जिल्हा न्यायाधीश राजेंद्र सावंत यांनी ही शिक्षा सुनावली. या प्रकरणात विशेष सरकारी अभियोक्ता म्हणून ॲड. प्रसाद पाटील यांनी काम पाहिले. या निकालाकडे संपूर्ण जिल्ह्याचे लक्ष लागून राहिले होते. आगामी स्थानिक स्वराज्य संस्थांच्या निवडणुकांच्या आधीच भोईर यांना शिक्षा ठोठावण्यात आल्याने त्यांच्या उमेदवारीचे मनसुबे धुळीस मिळाले आहेत.

मिळालेल्या माहितीनुसार, बहिरोळे येथील रुपाली थळे या चोंढी येथील व्हिटेवा कॉम्प्युटर क्लासमध्ये 11 सप्टेंबर 2012 रोजी सायंकाळी 60 मुलांचे वर्ग घेत होत्या. त्यांच्याकडे काम करणारा भूषण साबळे याला चहासाठी काही वस्तू आणण्यासाठी पाठविले होते. भूषणसोबत शाहबाज खानही गेला होता. ते दोघे बराच वेळ परत आले नाही. त्यामुळे त्यांना बाहेर पाहण्यासाठी थळे या गेल्या होत्या. त्यावेळी चोंढी नाक्यावर भूषण साबळे व शाहबाज खान यांना अतिष सुर्वे, सज्जाद मुल्ला, विक्रम साळुंखे व विक्रांत कुरतडकर ही मंडळी शिवीगाळी करुन धक्काबुक्की व मारहाण करीत होती. याबाबत मध्यस्थी करुन भूषण, शाहबाज व त्या चौघांना क्लासच्या मागे असलेल्या हॉलमध्ये नेले. त्यांच्यामधील वाद मिटवून पुन्हा क्लासमध्ये आले.

दिलीप भोईर उर्फ छोटम व त्यांचे सुमारे 25 ते 30 साथीदार हे काही हत्यारांसहीत क्लासमध्ये घुसले. ते भूषण व शहाबाजला शिवीगाळी व धक्काबुक्की करु लागले. त्यांना समजाविण्याचा प्रयत्न केला. परंतु, त्यांनी थळे यांनादेखील शिवीगाळी करुन धक्काबुक्की केली. तरीदेखील त्यांना पुन्हा समजावून क्लासच्या बाहेर जाण्यास सांगितले. दिलीप भोईर, राहुल दिलीप भोईर, विकम साळुंके, विक्रांत कुडतरकर उर्फ विकी, विशाल साळुंके, सज्जाद मुल्ला यांनी क्लासचे बॅनर फाडून तोडफोड केली. दिलीप भोईर यांनी त्यांच्या हातातील तलवारीने रुपाली थळे यांना मारण्याचा प्रयत्न केला. मात्र, त्यांनी हाताने अडविण्याचा प्रयत्न केला. परंतु, थळे यांच्या उजव्या हाताच्या करंगळीस दुखापत झाल्याने रक्त आले. भूषण व शहाबाज यांनी थळे यांना त्यांच्या धक्काबुक्कीतून सोडविण्याचा प्रयत्न केला. दिलीप भोईर व त्यांच्या साथीदारांनी भूषण, शहाबाज व थळे यांना बाहेर खेचून रस्त्यावर आणून मारहाण केली. त्यावेळी रुपाली थळे यांचे पती विजय थळे, त्यांचे मित्र अविनाश म्हात्रे व शिवाजी ईटकर त्याठिकाणी आले. त्यांनी या मारहाणीतून रुपाली थळेंसह अन्य मंडळींना सोडविण्याचा प्रयत्न केला. दिलीप भोईर यांनी विजय थळे यांना खाली पाडून त्यांच्या डोक्यावर तलवारीने वार करून त्यांना गंभीर जखमी केले. राहुल भोईर यांनी लोखंडी शिगेने त्यांच्या पाठीवर एक झोड घातली. विक्रम साळुंके यांनी रुपाली थळे यांच्या उजव्या हातावर शिगेचा फटका मारला. विकी कुडतरकर याने स्टम्पने पाठीत झोड घातली. विशाल साळुंके याने उजव्या मांडीवर लोखंडी शिगेने झोड घातली. मकरंद भोईर याने एका लाकडी दांडक्याने कमरेवर झोड घातली. दरम्यान, सोडविण्यास आलेल्या रुपाली थळे यांच्या नणंद मनिषा मनोहर घरत यांनादेखील धक्काबुक्की, शिवीगाळी व मारहाण केली. त्यांच्या गळ्यातील सोन्याचे गंठण कोणीतरी खेचून नेले आहे.

याप्रकरणी मांडवा सागरी पोलीस ठाण्यात गुन्हा दाखल करण्यात आला होता. याप्रकरणी अलिबाग येथील न्यायालयात त्यांच्याविरोधात दोषारोपपत्र दाखल करण्यात आले होते. चोंढी नाक्यावर घातक शस्त्राने मारहाण केल्या प्रकरणाचा निकाल अखेर तेरा वर्षांनंतर लागला. न्यायालयाने दिलीप भोईर यांच्यासह 21 जणांना गुरुवारी सायंकाळी शिक्षा सुनावली आहे. त्यामध्ये शिंदे गटातील दिलीप उर्फ छोटम विठ्ठल भोईर, विक्रम वामन साळुंखे, विक्रांत विश्वनाथ कुडतरकर, मकरंद रवींद्र भोईर, विकेश वसंत ठक्कर, भरत अभिमान्य खळगे, गणेश रमेश म्हात्रे, संतोष वामन साळुंखे, सज्जाद शगीर मुल्ला, गणेश बळीराम भोईर, विवेक विश्वनाथ कुडतरकर, शिशिर शंकर म्हात्रे, हेमंत अनंत केळकर, जयवंत शामराव साळुंखे, विरेश रमेश खेडेकर, प्रभाकर रामचंद्र गवाणकर, प्रसाद दत्ता शिवदे, अशोक शांताराम थळे, मनोज जगन्नाथ थळे, राजेंद्र काशिनाथ ठाकूर, विजय राजाराम ठाकूर यांचा समावेश आहे.

उमेदवारीचे स्वप्न भंगणार?
दिलीप भोईर गेली काही वर्षे भाजपचे कार्यकर्ते होते. विधानसभा निवडणुकीत महायुतीविरोधात काम केल्याने जिल्हाध्यक्ष खासदार धैर्यशील पाटील यांनी त्यांच्याविरोधात पक्षांतर्गत कारवाई करीत त्यांना निलंबित केले होते. त्यानंतरही ते काही महिने पक्षाचे काम करीत होते. अखेर जिल्हा परिषदमध्ये चांगली जागा देण्याचे आमिष आमदार दळवी यांनी दाखविल्यावर दिलीप भोईर यांनी काही महिन्यांपूर्वी शिंदे गटात प्रवेश केला. नुकतेच जिल्हा परिषदेच्या सदस्यपदांचे आरक्षण जाहीर झाले. मापगाव मतदारसंघात समाधानकारक आरक्षण लागल्याने दिलीप भोईर यांनी उमेदवारीची तयारी केली होती. परंतु, या निकालानंतर त्यांचे जिल्हा परिषदेच्या निवडणुकीत उभे राहण्याचे स्वप्न पूर्ण होईल का, असा प्रश्न जनमानसातून उपस्थित केला जात आहे. दिलीप भोईर यांनी यापूर्वी आमदारकीचेदेखील स्वप्न पाहिले होते. मात्र, आमदार दळवी यांनीच त्यांचा स्वप्नभंग केला होता, याचीदेखील आता चर्चा आहे.

न्यायालयाच्या परिसरात समर्थकांची गर्दी
चोंढी नाक्यावरील घातक शस्त्राने मारहाण प्रकरणाची सुनावणी अलिबागमधील न्यालयात होणार होती. त्यामुळे या निकालाकडे अलिबागसह संपूर्ण रायगड जिल्ह्याचे लक्ष लागून राहिले होते. दिलीप भोईर यांच्या समर्थकांनी अलिबागमधील न्यायालयाच्या परिसरात दुपारपासूनच गर्दी केली होती. यावेळी पोलिसांचा बंदोबस्तदेखील होता. न्यायालयाच्या निर्णयाकडे सर्वांचे लक्ष लागून राहिले होते. विशेष सरकारी अभियोक्ता ॲड. प्रसाद पाटील यांनी केलेले युक्तीवाद, तपासलेले साक्षी पुरावे, पोलिसांचा तपास आदी पुरावे ग्राह्य धरून न्यायालयाने दिलीप भोईर यांच्यासह 21 जणांना दोषी ठरवत शिक्षा सुनावली.

काय होते प्रकरण?
रुपाली विजय थळे यांनी दिलेल्या फिर्यादीवरुन आरोपी दिलीप भोईर आणि त्यांच्या साथीदारांनी दि. 11 ऑक्टोबर 2012 रोजी चोंढी येथील व्हिटेक कॉम्प्युटर क्लासमध्ये घुसून बॅनर्स फाडून, साहित्याची तोडफोड केली. तसेच गैरकायद्याची मंडळी जमवून तलवार, लोखंडी शिगा, स्टम्प्स व लाकडी दांडक्याने मारहाण, धक्काबुक्की व शिवीगाळी केली. फिर्यादींची नणंद मनिष घरत यांचे गंठण खेचून नेले, तसेच त्यांच्या पतींना जीवे ठार मारण्याचा प्रयत्न केला.

राजाभाई खुश
दिलीप भोईर यांनी शिंदे गटात प्रवेश केल्यापासून राजाभाईंचे वजन कमी झाल्याचे चित्र होते. आ. दळवी प्रत्येक निर्णयात दिलीप भोईर यांना विचारात घेऊन राजाभाईंना दूर करीत असल्याने गेल्या कित्येक दिवसांपासून ते नाराज होते. परंतु, आजच्या निकालानंतर राजाभाईंचा मार्ग मोकळा झाल्याची चर्चा सुरू असल्याने राजाभाई खुश झाल्याचे राजकीय वर्तुळात बोलले जात आहे.