मालमत्ता कर भरण्यास नागरिकांचा प्रतिसाद

। पनवेल । प्रतिनिधी ।

पनवेल महापालिकेच्या कर संकलन व कर आकारणी विभागाच्यावतीने नागरिकांच्या मनातील शंकाचे निरसन प्रसिध्दी माध्यमातून करण्यात आल्यानंतर कर भरण्यास नागरिकांचा प्रतिसाद वाढला आहे. गेल्या काही दिवसापासून कळंबोली, कामोठे, खारघर, पनवेल प्रभागातून एक कोटी हून अधिक थकित कर वसूल होत आहे. दरम्यान आयुक्त तथा प्रशासक मंगेश चितळे यांच्या सुचनेनंतर उपायुक्त स्वरूप खारगे यांनी जप्तीपूर्व नोटीसानंतर सात दिवस दिवसांचा कालावधी पुर्ण होऊनही मालमत्ता कर न भरलेल्या थकबाकीदारांना वॉरंट नोटीसा बजावण्यास सुरवात केली आहे.

आतापर्यंत पनवेल महानगरपालिका कार्यक्षेत्रातील विविध नोडमध्ये सुमारे 447 जप्तीपूर्वीच्या नोटीसा व 27 वॉरंट नोटीसांचे वाटप थकबाकीदार मालमत्ता धारकांना दिल्याने थकबाकीदारांचे धाबे दणाणले आहेत. आयुक्त मंगेश चितळे यांच्या सुचनेनूसार जप्ती मोहीम अधिक तीव्र करण्याचा इशारा महापालिकेच्यावतीने देण्यात आला आहे.

आजवर महापालिकेने सातत्याने नागरिकांना मालमत्ता कर भरण्याबाबत आवाहन केले आहे. परंतू आता महापालिकेने थकबाकीदारांच्या विरोधात कठोर पावले उचलण्यास सरुवात केली आहे. ज्या थकबाकीदारांना जप्ती नोटीसा दिल्या होत्या, अशा थकबाकीदारांकडून मालमत्ता कर वसुलीसाठी उपायुक्त स्वरूप खारगे व कर अधिक्षक महेश गायकवाड तसेच कर अधिक्षक सुनील भोईर यांच्या नेतृत्वाखाली वसुली पथकाच्या माध्यमातून पनवेल,कामोठे खारघर तसेच कळंबोली थकबाकीदारांना जप्ती व अटकावणीची कारवाई करण्यात येत आहेत. याचाच परिणाम म्हणजे चारही प्रभागामधून सुमारे आजपर्यंत 328 कोटींचा भरणा झाला आहे. दरम्यान मालमत्ता कर न भरल्यास त्याच्या शास्तीमध्ये प्रतिमहा 2 टक्क्यांची वाढ होत असल्याने तसेच महापालिकेच्यावतीने प्रसिध्दी माध्यमातून केलेल्या आवाहनामुळे नागरिकांच्या मनातील शंकाचे निरसन झाल्याने कर भरण्यास नागरिकांचा चांगला प्रतिसाद दिसून येत आहे. गेल्या दोन तीन दिवसापासून मालमत्ता कराच्या भरण्यामध्ये भरघोस वाढ होताना दिसत आहे.

पनवेल महापालिका क्षेत्रात 3 लाख 50 हजार निवासी, बिगर निवासी, व्यावसायिक, औद्योगिक आदी नोंदणीकृत मालमत्ता आहेत. या मालमत्ता धारकांकडून कर वसुलीसाठी महापालिकेचे विविध झोन तयार केले आहेत. तसेच ऑनलाईन आणि विविध अ‍ॅपच्या माध्यमातून कर भरण्याची सुविधा उपलब्ध करून देण्यात आली आहे. नागरिकांना मालमत्ता कर भरण्यासाठी महापालिकेत न येता ऑनलाईन पध्दतीने भरता यावा यासाठी महापालिकेने मसिटीझन प्रॉपर्टी टॅक्स पेमेंट गाईड म तयार केले आहे.