सहकलाकार ठरले शिल्पकार

। कोलकाता । वृत्तसंस्था ।

इडन गार्डनवर केकेआरच्या सुनिल नारायणने शतकी खेळी केली. आयपीएलमधली ही त्याची पहिलीच शतकी खेळी होती. हा धडाकेबाज फलंदाज केकेआरसाठी कायम हाणामारीची कामे करत आला आहे. मात्र, हाणामारी करता करता तो कधी शेवटपर्यंत जिवंत राहिला म्हणजे शतक ठोकलंय असे झाले नव्हते. मात्र, राजस्थान विरूद्ध त्याने आपल्या नावासमोर एक शून्य शून्य आकडा लावलाच.

केकेआरने राजस्थानविरूद्ध 223 धावा केल्या. त्यात सुनिल नारायणच्या 109 धावांचे मोठे योगदान होते. त्यानंतर केकेआरकडून सर्वाधिक धावा या अंगक्रिश रघुवंशीनं केल्या होत्या. त्याने 18 चेंडूत 30 धावा ठोकल्या. तर रिंकू सिंगने 9 चेंडूत 20 धावा ठोकत केकेआरला 220 चा टप्पा पार करून दिला.

राजस्थानच्या रन चेसमध्ये देखील अशाच शतकवीर बटलर सोडून दोन खेळाडूंनी छोटे मात्र अत्यंत महत्वाचे योगदान दिले. हे योगदान केकेआरच्या रघुवंशी अन् रिंकू सिंगपेक्षा सरस ठरले म्हणून आरआरने 223 धावा पार केल्या. यावेळी सगळा फोकस हा रियान परागवरच होता. या पठ्ठ्याने 42 च्या स्ट्राईक रेटने 14 चेंडूत 34 धावा कुटल्या. यामुळे राजस्थान 8 व्या षटकापर्यंतच शतकाच्याजवळ आला होता. राजस्थानची मधली फळी ढेर झाली त्यावेळी बटलरने आपल्या अडखळत्या सुरूवातीचे रूपांतर अर्धशतकी खेळीत केले होते.

राजस्थानला शेवटच्या सहा षटकात विजयासाठी 96 धावांची गरज होती. पॉवेलच्या छोट्या मात्र धडाकेबाज खेळीनंतर बटलरने प्रत्येक षटकात जवळपास 17-18 धावा वसूल केल्या. त्याने सामना जिंकून देण्याची सुरूवात ही 17 व्या षटकापासूनच केली होती. त्यामुळे शेवटच्या षटकात राजस्थानने सामन्यावर मजबूत पकड निर्माण केली होती. ही पकड इतकी मजबूत होती. की बटलरला तीन चार बॉलवर एकही धाव न घेणे देखील परवडले. अखेर शेवटच्या चेंडूवर चौकार मारत बटलरनं राजस्थानला 223 धावा चेस करून दिल्या.