सत्ताधाऱ्यांच्या आरोपावर विवेकानंद पाटील सरकारवर भडकले
| पुणे | प्रमोद जाधव/सायली पाटील |
एमपीएससी विद्यार्थ्यांच्या आंदोलनात 70 टक्के राजकीय लोक असून, केवळ 20 टक्के विद्यार्थी सहभागी आहेत, अशी टीका सत्ताधाऱ्यांकडून करण्यात आल्यानंतर विद्यार्थी आंदोलक विवेकानंद पाटील यांनी संतप्त प्रतिक्रिया व्यक्त केली. ‘या साहेब! हॉल तिकिट दाखवतो,’ असे थेट आव्हान देत पाटील यांनी आंदोलनातील विद्यार्थी सहभागाबाबत केलेल्या आरोपांना कृषीवलच्या माध्यमातून जोरदार प्रत्युत्तर दिले.
एमपीएससी विद्यार्थ्यांच्या विविध प्रश्नांसाठी पुण्यात सुरू असलेल्या आंदोलनावर सत्ताधाऱ्यांकडून राजकीय आरोप केले जात असल्याने आंदोलकांमध्ये नाराजी व्यक्त होत आहे. हे आंदोलन विद्यार्थ्यांचे नसून राजकीय स्टंट असल्याची टीका करण्यात आली होती. तसेच आंदोलनात विद्यार्थ्यांपेक्षा राजकीय कार्यकर्त्यांची संख्या अधिक असल्याचा दावा करण्यात आला. या टीकेवर विवेकानंद पाटील यांनी आंदोलनस्थळी संताप व्यक्त केला.
आपण राजकीय कार्यकर्ता नसून एमपीएससीची तयारी करणारा विद्यार्थी असल्याचे दाखवून देण्यासाठी ”हॉल तिकिट दाखवतो” असे म्हणत त्यांनी थेट आव्हान दिले. विद्यार्थ्यांच्या प्रश्नांवर आंदोलन करणाऱ्यांना राजकीय ठरवण्याऐवजी त्यांच्या मागण्यांकडे सरकारने लक्ष द्यावे, अशी भूमिका त्यांनी मांडली. याशिवाय आंदोलनात विद्यार्थी कमी आणि राजकीय व्यक्ती अधिक असल्याच्या सरकारच्या भूमिकेवरही पाटील यांनी भाष्य केले. सरकारने आंदोलनात 20 टक्के विद्यार्थी असल्याचे मान्य केले, हीच आंदोलनात विद्यार्थी असल्याची एकप्रकारे कबुली असल्याचे त्यांनी म्हटले. हा प्रश्न विद्यार्थ्यांच्या मेहनतीचा आणि त्यांच्या भवितव्याचा असून, आंदोलनाला राजकीय रंग देऊन मूळ प्रश्न बाजूला करण्याचा प्रयत्न करू नये, असा सूर पाटील यांच्या प्रतिक्रियेतून उमटला.
एमपीएससीची संपूर्ण बॉडीच रिस्ट्रक्चर करा!
महाराष्ट्र लोकसेवा आयोगाच्या (एमपीएससी) संपूर्ण यंत्रणेचे पुनर्रचना करून त्यामध्ये पारदर्शकता आणण्यासाठी सरकारने प्रयत्न करावेत, अशी मागणी विद्यार्थी आंदोलक विवेकानंद पाटील यांनी केली. विद्यार्थ्यांच्या हितासाठी सरकारने सकारात्मक निर्णय घ्यावा, अशी विनंतीही त्यांनी केली.
अध्यक्षांचा नैतिक राजीनामा घ्या
एमपीएससीच्या अध्यक्षांनी संविधानिक प्रक्रियेतून नव्हे, तर नैतिकतेच्या आधारावर स्वतःहून राजीनामा द्यावा, अशी आंदोलकांची भूमिका असल्याचे पाटील यांनी स्पष्ट केले. येत्या दोन दिवसांत अध्यक्ष राजीनामा देतील, असा विश्वासही त्यांनी व्यक्त केला. अध्यक्षांचा राजीनामा ही आंदोलन सुरू केल्यापासूनची प्रमुख मागणी असून, सरकारने ती मान्य करावीच लागेल, असे त्यांनी सांगितले. मुख्यमंत्र्यांच्या भेटीसाठी तीन शिष्टमंडळे गेली होती. तिसरे शिष्टमंडळ बैठकीतून नाराज होऊन बाहेर आले. त्यानंतर रोहित पवार यांनी आंदोलन सुरू ठेवण्याबाबत आपली भूमिका स्पष्ट केली. आंदोलकांच्या बारा मागण्यांपैकी अकरा मागण्या मान्य झाल्या असल्या तरी अध्यक्षांच्या राजीनाम्याची प्रमुख मागणी अद्याप कायम असल्याचे पाटील यांनी सांगितले.
पदाची गरिमा राखा
एमपीएससीने यूपीएससीचा केवळ अभ्यासक्रम नव्हे, तर संरचना स्वीकारावी आणि संपूर्ण आयोगाची पुनर्रचना करावी, अशी मागणीही त्यांनी केली. आयोगाच्या अध्यक्षपदासाठी तुकाराम मुंढे यांच्या नावाची मागणी केली असली तरी त्या पदावर कोणीही असावे; मात्र त्यांनी पदाची गरिमा आणि पारदर्शकता राखावी, अशी भूमिका पाटील यांनी मांडली.
...अन्यथा आंदोलन तीव्र होईल
अध्यक्षांनी राजीनामा न दिल्यास पुढील रणनीतीबाबत रोहित पवार निर्णय घेतील. आंदोलन सामूहिक असून त्याची धार आणखी तीव्र करण्याचा प्रयत्न केला जाईल, असा इशाराही पाटील यांनी दिला. सरकार या संवेदनशील प्रश्नावर सकारात्मक निर्णय घेईल, अशी अपेक्षा त्यांनी व्यक्त केली.