। नवी दिल्ली । वृत्तसंस्था ।
पेट्रोलियम कंपन्यांनी आता व्यावसायिक लिक्विफाइड पेट्रोलियम गॅस अर्थात एलपीजी सिलिंडरच्या किंमतीत 43 रुपयांची वाढ केली आहे. किंमतीतील या वाढीनंतर दिल्लीतील 19 किलोच्या व्यावसायिक प्रति सिलिंडरची किंमत आता 1736.50 रुपये इतकी झाली आहे. 1 ऑक्टोबरपासून व्यावसायिक गॅस सिलिंडरच्या किमतीत वाढ करण्यात आली आहे. घरगुती एलपीजी सिलिंडरच्या दरामध्ये मात्र कोणताही बदल झालेला नाही. दरम्यान, यापूर्वी अवघ्या महिन्याभरापूर्वी, म्हणजेच 1 सप्टेंबर रोजी व्यावसायिक एलपीजी सिलिंडरच्या किंमतीत 75 रुपयांची वाढ करण्यात आली होती.
केंद्र सरकारने गुरुवारी नैसर्गिक वायूच्या किंमतीत 62 टक्के वाढ केली आहे. या गॅसचा वापर खत, वीजनिर्मिती, सीएनजीच्या स्वरूपात वाहन इंधन आणि स्वयंपाकासाठी गॅस म्हणून केला जातो. दिल्ली आणि मुंबईसारख्या शहरांमध्ये सीएनजी आणि पाईप केलेल्या स्वयंपाकाच्या गॅसचे दर 10-11 टक्के वाढण्याची शक्यता आहे. एप्रिल 2019 नंतर किमतीतील ही पहिली वाढ आहे.
सार्वजनिक क्षेत्रात ओएनजीसी आणि ऑइल इंडिया या दोन कंपन्यांना नैसर्गिक वायूसाठी 2.90 डॉलर प्रती दशलक्ष ब्रिटिश थर्मल युनिट असा दर निश्चित करण्यात आला आहे. पुढील सहा महिन्यांसाठी हा दर निश्चित करण्यात आला असल्याचे पेट्रोलियम मंत्रालयाच्या पेट्रोलियम प्लॅनिंग अँड अॅनलेसिस सेल या विभागाने म्हटले आहे. नैसर्गिक वायूची झालेली ही दरवाढ 1 ऑक्टोबरपासून पुढच्या 6 महिन्यांसाठी लागू होणार आहे.
सीएनजीचे दर वाढणार
ऑक्टोबर महिन्याच्या पहिल्याच दिवशी सरकारने पुन्हा एकदा महागाईचा झटका दिला आहे. नैसर्गिक वायूंच्या किंमतीत 62 टक्क्यांनी वाढ करण्यात आली आहे. त्यामुळे वाहनांमध्ये वापरल्या जाणार्या सीएनजी आणि प्रमुख शहरांमध्ये घरगुती वापरासाठी पुरवठा केल्या जाणार्या पाईप गॅसच्या किमतीत मोठी वाढ होण्याची शक्यता आहे.