महागणपतीच्या दर्शनासाठी भाविकांची गर्दी

| चिरनेर | प्रतिनिधी |

उरण तालुक्यातील चिरनेर श्री महागणपती क्षेत्रात, अंगारकी संकष्टी चतुर्थी निमित्ताने उन्हाची तमा न बाळगता अगदी पहाटेपासूनच भाविकांनी प्राचीन जागृत श्री महागणपतीच्या दर्शनाचा लाभ घेतला. पहाटे चार वाजल्यापासून गणेश भक्तांच्या दर्शनासाठी मंदिर खुले करण्यात आले होते. प्रथमतः श्री महागणपतीची महापूजा करण्यात आली. त्यानंतर गणेश भक्तांनी श्रींच्या दर्शनाला सुरुवात केली. दुपारी गर्दीचे प्रमाण थोडेसे कमी झाले होते. मात्र, सकाळी आणि संध्याकाळी गणेश भक्तांनी गणेश मंदिर गाठून श्रींचे दर्शन घेतले. पेशवेकालीन मंदिरात प्राचीन श्री महागणपतीची मूर्ती विराजमान आहे. दिवसभर श्री महागणपतीच्या मंदिरात भजनांचा सूर ऐकायला मिळाला. मंगळवारी (दि.5) अंगारकी चतुर्थीचा योग आल्याने, भाविकांच्या गर्दीचा उच्चांक पाहायला मिळाला. संकष्टी चतुर्थीच्या निमित्ताने हार, गावठी भाज्या, वाल, चवळी, रानटी कंदमुळे, स्थानिक कुंभारानी बनविलेली मातीची भांडी, तसेच अन्य पदार्थांच्या विक्रीला ग्राहकांनी पसंती दर्शविल्याचे निदर्शनास आले. चिरनेर परिसरातील अनेक रहिवाशांना दर महिन्याच्या संकष्टी चतुर्थीच्या निमित्ताने रोजगार मिळत आहे. नेहमीप्रमाणे उरण, पनवेल, पेण, नवी मुंबई येथील भाविकांनी श्रींच्या दर्शनाचा लाभ घेतला असल्याचे गणपती देवस्थानतर्फे सांगण्यात आले.