दापोली-पुणे शिवशाही बसला अपघात; तिघेजण जखमी

| महाड | वार्ताहर |

दापोली येथून दुपारी दोन वाजता सुटणारी दापोली -पुणे ही बस बुधवारी (दि.02) महाड तालुक्यातील रेवतळे आंग्रे कोंड येथे वळणावर आली असता. गाडीचे ब्रेक फेल झाल्याने बसचा अपघात झाला. या अपघातात शिवशाहीमधील तीन प्रवासी किरकोळ जखमी झाले असून, चालकाच्या प्रसंगावधानामुळे बस दरीत कोसळण्यापासून वाचली. जखमींवर खाजगी रुग्णालयात उपचार सुरू आहेत. 

दापोली येथून दुपारी दोन वाजता सुटणारी दापोली -पुणे ही बस महाड तालुक्यातील रेवतळे आंग्रे कोंड येथे वळणावर आली असता, चालक साबळे याने ब्रेक मारण्याचा प्रयत्न केला असता ब्रेक लागत नसल्याने त्याने प्रसंगावधान राखून रस्त्या जवळील गटारात गाडी उतरवण्याचा प्रयत्न केल्याने बसमधील 22 प्रवाशांचे प्राण वाचले आहेत. मात्र, रस्त्याच्या बाजूला असणाऱ्या अशोक भास्कर यांच्या संरक्षण भिंतीला जाऊन बस धडकल्याने पुढील अनर्थ टळला. या बसमधून पुण्यासाठी प्रवास करणारे तीन प्रवासी जखमी झाले. जखमी झालेल्या प्रवाशांची नावे पुढील प्रमाणे महेंद्र चौरसिया, सुरज जाधव, विकास राठोड अशी असून, त्यांना महाड येथील रायगड क्लिनिक या खाजगी रुग्णालयात उपचारांसाठी दाखल करण्यात आले.

याबाबतची माहिती महाड एसटी आगाराला प्राप्त होताच एसटीचे पथक व रुग्णवाहिका तात्काळ घटनास्थळी दाखल झाले. गाडीतील अन्य प्रवाशांना नेण्यासाठी महाड आगारातून एसटी बस उपलब्ध करून देण्यात आली. एकंदरीत शिवशाही बस या भंगार झाले असून, या गाड्यांचे मेंटनस व देखभाल दुरुस्तीकडे दुर्लक्ष होत असल्याने शिवशाही बस वारंवार बंद पडण्याचे प्रकार व अपघात होण्याचे प्रकार सातत्याने घडत आहेत. मात्र, राज्यकर्ते सोयीप्रमाणे एस टी महामंडळाकडे दुर्लक्ष करीत असल्याने त्याचा मनस्ताप प्रवाशांना सहन करावा लागत आहे.