। माथेरान । मुकुंद रांजाणे ।
काही वर्षांपूर्वी माथेरानमध्ये फोटोग्राफरचा व्यवसाय करण्यासाठी आलेले आणि अल्पावधीतच सर्वांशी आपुलकीने वागणारे नकीम हकीम शेख या तरुणाला दि.19 रोजी हृदयविकाराचा तीव्र झटका आला. त्यांना तातडीने माथेरान नगरपरिषदेच्या दवाखान्यात दाखल करण्यात आले. मात्र डॉक्टरांच्या गैरहजेरीमुळे वेळेत उपचार मिळू न शकल्यामुळे त्यांना जीव गमवावा लागल्याची संतापजनक घटना माथेरानमध्ये सोमवारी घडली. त्यामुळे गावात नगरपरिषदेच्या या गलथान कारभाराबाबत संताप व्यक्त केला जात आहे.
येथील शारलोट लेक या ठिकाणी नकीम शेख हे नेहमीप्रमाणे आपला फोटोग्राफीचा व्यवसाय करून घरी आल्यावर त्यांची तब्बेत अचानक बिघडली. त्यांना दवाखान्यात उपचारासाठी नेण्यासाठी वेळेत रुग्णवाहिका उपलब्ध होऊ शकली नाही. यामध्ये बराच वेळ वाया गेला. त्यामुळे अत्यंत अडचणीचा भाग असणार्या दाट वस्तीतील संत रोहिदास नगर येथून शेजारील मित्र परिवाराने त्यांना हातरीक्षा मधून दवाखान्यात नेले. परंतु त्याठिकाणी नव्याने रुजू झालेले डॉक्टर रॉय हे उपस्थित नव्हते. अशावेळी त्यांना पुढील उपचारासाठी अन्य ठिकाणी हलविण्यात आले. परंतु तेथील वैद्यकीय अधिकार्यांनी त्यांना मृत घोषित केले.
माथेरान हे प्रदूषण मुक्त पर्यटनस्थळ असल्याने इथे मोटार वाहनांना बंदी आहे. केवळ स्थानिकांच्या मागणीनुसार इथे रुग्णांना तसेच वेळप्रसंगी पर्यटकांना अत्यावश्यक सेवा उपलब्ध असावी, यासाठी रुग्णवाहिका कार्यान्वित करण्यात आली आहे. सदर रुग्णवाहिका काही नगरसेवकांच्या घरची गाडी असल्याप्रमाणे तिचा सर्रासपणे नेहमीच भाडे सुध्दा न देता दुरुपयोग केला जात असतो. यावर कुणाचाही अंकुश नसल्यामुळे गैरवापर केला जात असून यात मोठया प्रमाणावर आर्थिक उलाढाल सुध्दा होत असते. हे नागरिकांना सुध्दा ज्ञात आहे. अनेकदा अत्यावश्यक वेळेस ही रुग्णवाहिका उपलब्ध होत नाही. तर 108 ह्या रुग्णवाहिकेत सुध्दा वारंवार तांत्रिक बिघाड असल्याचे सांगितले जाते. मागील काही वर्षांपासून या रुग्णवाहिकेचा वडाप सारखाच वापर सुरू असून चोवीस तास प्रतिष्ठित लोकांच्या सेवेत विना मोबदला असते.
एक नव्हे तर एकूण तीन रुग्णवाहिका इथे उपलब्ध आहेत. परंतु वेळेवर एकही उपलब्ध होऊ शकली नाही. त्यामुळे एका सर्वसामान्य फोटोग्राफरला आपले प्राण गमवावे लागले. अनेक दानशूर लोकांनी या दुर्गम भागातील दवाखान्यासाठी अत्याधुनिक यंत्रसामग्री असलेली उपकरणे देणगी दाखल दिलेली आहेत. त्याचा उपयोग अथवा ही मशिनरी हाताळण्यासाठी कर्मचार्यांची नियुक्ती करण्यात आलेली नाही.
नकीम याच्या मृत्यूस येथील वाहतूक व्यवस्था तितकीच जवाबदार आहे. रुग्णवाहिकेच्या भरोश्यावर किती दिवस काढायचे? ई-रिक्षा सारखी वाहतूक व्यवस्था निर्माण झाली पाहिजे. पर्यावरणापेक्षा माणसाचा जीव अमूल्य आहे. नकीमला तात्काळ वाहन मिळाले असते; तर हॉस्पिटलपर्यंत वेळेत पोहचू शकला असता.
सुनील शिंदे -सचिव, श्रमिक हातरीक्षा संघटना माथेरान
माथेरानकर नकीमच्या अकाली जाण्याने हळहळ व्यक्त करीत आहेत. हृदयविकाराच्या वेळी जे उपचार रूग्णाला लागतात, ते बी जे हॉस्पीटलमधील डॉ. रॉय यांच्या गैरहजेरीत मिळू शकले नाही. ही बाब निश्चितच निषेधार्थ आहे. डॉ. रॉय यांना माथेरानला सेवा देणे अवघड असेल तर तसा अहवाल स्थानिक प्रशासनाने जिल्हाधिकारी यांच्याकडे सुपूर्द करावा.
योगेश जाधव- अध्यक्ष वन संरक्षण समिती माथेरान