आंबेवाडी प्राथमिक आरोग्य केंद्रात रिक्त जागा भरण्याची मागणी

| गोवे-कोलाड । वार्ताहर ।
प्राथमिक आरोग्य केंद्र आंबेवाडी अंतर्गत असलेल्या उपकेंद्रांमध्ये अनेक वर्ष महत्त्वाच्या जागा रिक्त असून त्या अद्यापही भरल्या नसल्यामुळे अन्य कर्मचार्‍यांवर अधिक कामाचा मोठा ताण पडत आहे. या आरोग्य केंद्राच्या अंतर्गत कुडली, सुतारवाडी, तळवळी, गारभट, संभे, धाटाव अशा ठिकाणी उपकेंद्र असून या केंद्रांची लोकसंख्या 61,481 एवढी असून 51 गावांचा समावेश आहे.

धाटाव, संभे, गारभट या उपकेंद्रात आरोग्य सेविका पद रिक्त आहे. त्याचप्रमाणे उपकेंद्र तळवली आणि संभे यांचे आरोग्य सेवक पद रिक्त आहे. त्याचप्रमाणे प्राथमिक आरोग्य केंद्र आंबेवाडी येथे हिवताप कार्यालयात आरोग्य सहाय्यक हे पद रिक्त आहे. या रिक्त असलेल्या पदांच्या जागा न भरल्यामुळे कार्यरत असलेल्या कर्मचार्‍यांना अतिरिक्त कामांचा मोठा ताण पडत आहे. वरील प्राथमिक आरोग्य उपकेंद्र ही ग्रामीण भागात असून त्या ठिकाणी विविध ठिकाणाहून आलेल्या नागरिकांची गैरसोय होत असते. नागरिकांची गैरसोय दूर व्हावी तसेच कार्यरत असलेल्या कर्मचार्‍यांवरील अधिक कामाचा ताण पडू नये म्हणून उपकेंद्रांमध्ये रिक्त असलेल्या जागा लवकरात लवकर भराव्यात अशी नागरिकांची मागणी आहे.