दक्षिण-मध्य मुंबईत देसाई-शेवाळेंमध्ये लढत

| मुंबई | वृत्तसंस्था |

दक्षिण मध्य मुंबई लोकसभा मतदारसंघाने अनेक दिग्गजांना निवडून दिले. यात भारतीय कम्युनिस्ट पक्षाचे कॉम्रेड श्रीपाद अमृत डांगे, गिरणी कामगारांचे आक्रमक नेते दत्ता सामंत यांचाही समावेश होतो. 1989 मध्ये वामनराव महाडिक यांच्या रूपाने हा मतदारसंघ शिवसेनेकडे आला. त्यानंतर एक अपवाद वगळता हा मतदारसंघ शिवसेनेकडेच राहिला आहे. 1991 ते 2009 या कालावधीत सलग पाच लोकसभा निवडणुकीत शिवसेनेच्या मोहन रावले यांनी या मतदारसंघात शिवसेनेचा भगवा फडकवला होता.

2009 च्या लोकसभा निवडणुकीत काँग्रेसच्या एकनाथ गायकवाड यांनी हा मतदारसंघ काँग्रेसकडे खेचला. त्यानंतर मात्र 2014 आणि 2019 या दोन्ही लोकसभा निवडणुकीत शिवसेनेच्या राहुल शेवाळे यांनी पुन्हा हा मतदारसंघ शिवसेनेच्या ताब्यात आणला. दक्षिण मध्य मुंबईतून यावेळेस प्रामुख्याने ठाकरे गटाचे अनिल देसाई यांच्या विरोधात शिंदे गटाचे खासदार राहुल शेवाळे यांच्यात लढत होणार आहे.

राजकीय समीकरणे
शेवाळे यांनी मागच्या निवडणुकीत काँग्रेसच्या एकनाथ गायकवाड यांचा 1 लाख 51 हजार मतांनी पराभव केला होता. शेवाळे यांना सर्वाधिक 91 हजार मते ही माहीम विधानसभा मतदारसंघातून मिळाली होती. यावेळी माहीमचे आमदार सदा सरवणकर हे शिंदे गटासोबत असल्याने त्याचा फायदा शेवाळे यांना मिळेल. माहीम खालोखाल चेंबूर मतदारसंघात 75 हजार मते शेवाळे यांना मिळाली होती. मात्र यावेळेला येथील आमदार प्रकाश फातर्फेकर हे उद्धव ठाकरे यांच्यासोबत असल्याने शेवाळे यांना फटका, तर अनिल देसाई यांना येथून आघाडी मिळू शकेल. याशिवाय भाजपच्या कालिदास कोळंबकर यांच्या वडाळा विधानसभेत, भाजपच्या कॅप्टन तमिळसेल्वन यांच्या सायन कोळीवाडामध्ये शेवाळे यांना फायदा होण्याची शक्यता आहे.

2019 चे चित्र
राहुल शेवाळे (शिवसेना) विजयी मते : 4,24,913
एकनाथ गायकवाड (काँग्रेस) मते : 2,72,774
संजय भोसले (वंचित) मते : 62,256
अहमद शेख (बसप) मते : 8,623
विजयी उमेदवाराचे मताधिक्य : 1,52,138