भाविकांच्या टेम्पोला अपघात; दोघांचा मृत्यू

13 भाविक जखमी

। जेजुरी । प्रतिनिधी ।

सासवड रस्त्यावर बेलसर गावाजवळ सोमवारी (दि. 30) पहाटे भाविकांच्या टेम्पोला अपघात झाला. या अपघातात दोन भाविकांचा मृत्यू झाला असून 13 भाविक जखमी झाले आहेत. जखमींवर जेजूरीतील खासगी रुग्णालयात उपचार सुरू आहेत.

आंबेगाव तालुक्यातील कुरवंडी गाव परिसरातून जेजुरी येथे सोमवती यात्रेनिमित्त रविवारी रात्री काही भाविक टेम्पोतून निघाले होते. दरम्यान सासवड-नीरा रस्त्यावर बेलसर गावाजवळ आले असता पहाटे अडीचच्या सुमारास समोरुन येणाऱ्या एका भरधाव टेम्पोने भाविकांच्या टेम्पोला धडक दिली. या धडकेत दोन भाविकांचा जागीच मृत्यू झाला. तर 13 जण जखमी झाले. अपघाताची माहिती मिळताच स्थानिकांनी तसेच जेजुरी पोलिसांनी घटनास्थळी धाव घेतली. त्यांनी जखमींना तातडीने जेजूरीतील खासगी रुग्णालयात दाखल केले. याप्रकरणी पोलिसांनी टेम्पोचालकाविरुद्ध गुन्हा दाखल केला असून याबाबत अधिक तपास पोलीस करत आहेत.