दीनानाथ मंगेशकर रुग्णालयाच्या अडचणीत वाढ

तिसर्‍या अहवालातून मोठी माहिती उघड

। पुणे । प्रतिनिधी ।

पुण्यातील दीनानाथ मंगेशकर रूग्णालयातील गर्भवती महिलेच्या मृत्यू प्रकरणासंदर्भात एक अपडेट समोर आली आहे. पुण्यातील गर्भवती महिलेच्या मृत्यू प्रकरणाचा तिसरा अहवाल समोर आला असून यातून ईश्‍वरी भिसे यांच्या मृत्यूचे कारण उघड झाले आहे. तातडीने उपचार न मिळाल्याने गर्भवती महिला ईश्‍वरी भिसे यांचा मृत्यू झाल्याचे अहवालातून समोर आले आहे. यासह मेंदूला ऑक्सिजनचा पुरेसा पुरवठा झाला नाही. मेंदूच्या पेशींवर परिणाम होऊन मेंदूचे कार्य बिघडल्याने मृत्यू झाला, असे अहवालात सांगण्यात आले आहे.

दीनानाथ मंगेशकर रूग्णालयातील गर्भवती महिलेच्या मृत्यू प्रकरणासंदर्भात आतापर्यंत तीन अहवाल समोर आले आहेत. यातील तिसरा अहवाल हा पुणे महापालिकेकडून सादर करण्यात आला असून माता मृत्यू अन्वेषण समितीचा अहवाल राज्य सरकारपुढे सादर झाला आहे. दरम्यान, भिसे कुटुंबीयांकडून नुकतीच एक प्रेस नोट जाहीर करण्यात आली होती. यामध्ये भिसे कुटुंबीयांकडून पाच मागण्या करण्यात आल्याचे पाहायला मिळाले होते.