| कोर्लई | वार्ताहर |
आपत्ती काही सांगून येत नाही. यासाठी आपत्तींवर मात करण्यासाठी आपत्ती व्यवस्थापन प्रशिक्षण ही काळाची गरज असून, विद्यार्थी व नागरिकांनी याचा अधिकाधिक लाभ घ्यावा, असे प्रतिपादन होमगार्डचे माजी जिल्हा समावेशक अॅड. के.डी. पाटील यांनी केले.चोंढी-किहीम येथील लोकमान्य शिक्षण प्रसारक मंडळाच्या कला, वाणिज्य व विज्ञान महाविद्यालयाच्या सातिर्जे येथील प्राथमिक शाळेत आयोजित राष्ट्रीय सेवा योजना शिबिरात आपत्ती व्यवस्थापन विषयावर त्यांनी विद्यार्थ्यांना मार्गदर्शन केले.
या महाविद्यालयाचे राष्ट्रीय सेवा योजनेचे सात दिवसीय श्रम संस्कार शिबीर सातिर्जे येथील या जि.प.च्या प्राथमिक शाळेत दि.16 ते दि.22 जानेवारी कालावधीत संपन्न होत असून, त्यानिमित्ताने ग्रामसर्वेक्षण, स्वच्छता अभियान, श्रमदान, वन संवर्धन, पर्यावरण संवर्धन, व्यक्तिमत्व विकास कार्यक्रम, महिला सक्षमीकरण कार्यक्रम, आरोग्य तपासणी आदी. विविध कार्यक्रमांचे आयोजन करण्यात आले आहे. दरम्यान, अॅड. पाटील यांनी आपत्ती व्यवस्थापनविषयक प्रात्यक्षिकासह मोलाचे मार्गदर्शन केले.
यावेळी जिल्हा न्यायालय विधी सेवा प्राधिकरण सचिव तथा न्यायाधीश ए.ए. शिंदे यांनी मराठी भाषा संवर्धन दिनाचे औचित्य साधून जिल्हा विधी सेवा प्राधिकरण व न्यायालयाबाबत माहिती दिली. यावेळी अॅड. के.डी. पाटील, प्रणिता मगर, सरपंच प्राजक्ता खडपे, उपसरपंच अॅड. उमेश ठाकूर, प्रा. लिना पाटील, राष्ट्रीय सेवा योजना कार्यक्रम अधिकारी प्रा. सचिन गोंधळी, प्रा. प्रवेश पाटील, प्राध्यापक, विद्यार्थी प्रतिनिधी श्रेया साळुंखे, फैजान दाते, ओम घरत, अल्फिया तांबे, महाविद्यालयीन विद्यार्थी उपस्थित होते.